Stjarnan er þannig fé­lag að það er að­eins litið upp á við

„Maður reynir nú alltaf að halda hreinu en þetta er karakter í liðinu miðað við það sem er búið að gerast og ganga á þá sýndu strákarnir karakter,“ sagði markvörðurinn öflugi um leik kvöldsins en þetta var annað árið í röð sem Stjarnan lendir undir gegn KR á Meistaravöllum en kemur til baka og vinnur 2-1 sigur.

„Þetta er alltaf leitin að fyrsta sigurleiknum og eftir því sem það dregst þeim mun pressa kemur. Þetta byrjaði ekki vel, það kom smá stress, okkur var svo slátrað á Kópavogsvelli og það leit ekki vel út en við töluðum um það eldri leikmennirnir að við ætluðum að reyna að halda þessu gangandi. Sýna lit og þó það gangi illa að koma með bros á vör, peppa mannskapinn og svo þegar fyrsti sigurleikurinn kemur þá kemst maður í smá gír,“ sagði Haraldur um frammistöður Stjörnunnar undanfarið en liðið hefur nú spilað fimm leiki án taps í Pepsi Max deildinni.

Þá hrósaði Haraldur samherja sínum Eyjólfi Héðinssyni í hástert þar sem Eyjólfur þurfti að leysa miðvörðinn er Björn Berg Bryde meiddist í fyrri hálfleik. Eggert Aron Guðmundsson fékk einnig hrós en hann kom inn af bekknum og skoraði sigurmarkið.

„Hann hefur eflaust verið skítstressaður að koma inn á en sjá brosið eftir leik og fólk að syngja nafnið hans. Þetta er frábært fyrir hann.“

„Við þurfum að hugsa um næsta leik, það er þessi klisja. Síðan ég kom í Stjörnuna hefur aldrei verið litið niður á við í töfluna, Stjarnan er þannig félag að það er ekki litið niður á við, það er aðeins litið upp á við. Næsti leikur, ná í þrjú stig og þá er ekkert verið að spá í hvað er fyrir neðan sig,“ sagði Haraldur að endingu.

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.