Grætur kaldar kveðjur frænku sinnar krókódíl­stárum

Jóhann Páll var gestur í útvarpsþættinum Harmageddon í morgun. Þar var hin svonefnda skæruliðadeild Samherja rædd en hún hefur verið nokkuð til umfjöllunar að undanförnu. Fjölmiðlarnir Kjarninn og Stundin hafa undir höndum gögn sem fundust í síma Páls Steingrímssonar skipstjóra; eindregins stuðningsmanns Samherja sem afhjúpa samantekin ráð. Fram hefur komið að sérstakur hópur hefur unnið einarðlega að því að ófrægja alla þá sem fjallað hafa um sjávarútvegsfyrirtækið og/eða fyrirtækið telur sér óvinveitt.

„Kjaftæðið í fíflinu honum frænda mínum“

Jóhann Páll er einn þeirra sem kemur þar við sögu en í samskiptum hópsins sem mynda hina svokölluð Skæruliðadeild, segir Arna Bryndís Baldvins McClure lögfræðingur Samherja og virkur meðlimur í áróðursdeild fyrirtækisins í skilaboðum til Þorbjörns Þórðarsonar lögfræðings og PR-manns fyrirtækisins, hvort hann geti ekki hent upp svörum; auðvelt sé að svara „kjaftæðinu í fíflin honum frænda mínum“ en það var í tengslum við greinaskrif Jóhanns Páls um fyrirkomulag í sjávarútvegi.

Jóhann Páll segist ekki hafa átt í miklum samskiptum við frænku sína, varla nokkrum en þetta séu kaldar kveðjur frá henni. „Þetta var óvænt… óvænt ánægja. En maður hlýtur að vera að gera eitthvað rétt ef þetta fólk er óánægt.“

Ekkert varð af neinum svörum en þau áttu að varða grein Jóhanns Páls:

Jóhann Páll segir að kvótakerfið sé fyrir sér einhvers konar Frankenstein-saga þar sem stjórnmálamenn eru í hlutverki vísindamannsins. „Það hefur orðið þessi svakalegi auður til í sjávarútvegi sem er afleiðing af því að stjórnmálastéttin úthlutar veiðiheimildum ár eftir ár, áratugi eftir áratugi, langt undir markaðsverði. Við bjóðum ekki út aflaheimildir þannig að þetta rennur til eigenda fárra og nátengdra fyrirtækja. Samt eru þetta auðlindir sem eru í eigu þjóðarinnar.“

Ofsagróði úr sameiginlegri auðlind skapar hömluleysi

Og þessi auður skapar hömlulaust fólk er spurt og Jóhann Páll segir svo vera, í tilviki Samherja. „Þessi ofsagróði og ofurauður í skattkerfi sem hyglar þeim tekjuhæstu á kostnað almennings. Gríðarlegar eignir sem erfast milli kynslóða; ólígarkafyrirkomulag. Sem rekja má til þess hvernig nýtingu auðlindarinnar er háttað. Við sjáum að þarna fer í gang maskína, ríki í ríkinu sem fer í að grafa undan og sverta trúverðugleika þeirra sem miðla upplýsingum.“

Vék þá sögunni að nýjustu afhjúpuninni tengdum gögnum úr síma hins mjög svo fyrirtækjaholla skipstjóra, þeim að Kristján Þór hafi verið í beinu sambandi við þessa áróðurssmaskínu Samherja. Jóhann Páll segir það bæði sjokkerandi og að það setji allt þetta mál á annað stig.

„Auðvitað ætti Kristján Þór Júlíusson ekki að vera sjávarútvegsráðherra. Það liggur fyrir. Að hann hafi seti allt þetta kjörtímabil, þrátt fyrir allt sem á undan er gengið, afhjúpun Samherjaskjalanna, notaður sem punktudúkka þegar Samherjar voru að gera hosur sínar grænar fyrir namibískum ráðamönnum, hann er fyrrverandi stjórnarformaður Samherja og hefur þegið tugi milljóna nýlega frá þeim, verið þar á launum á sjó í þinghléum.“

Ríkisstjórnin um óbreytt ástand

Jóhann Páll segir að þá staðreynd að Kristján Þór sé sjávarútvegsráðherra og sitji enn skýr skilaboð til þjóðarinnar og staðfesting á því að sú ríkisstjórn sem nú er við völd mun ekki, ætlar sér ekki og hefur aldrei ætlað sér að hrófla á nokkurn hátt við ofurvaldi hinna fáu fjársterku í sjávarútvegi.

„Nú þegar þetta liggur fyrir um Kristján Þór hljótum við að gera kröfu að hann birti, strax í dag, samskipti sín við áróðursdeildinni.“

Fram kom í viðtalinu að takmarkaðar upplýsingar liggi fyrir um hvers eðlis samskipti Páls Steingrímssonar og sjávarútvegsráðherra voru en þó að 

hann hafi ráðfært sig sérstaklega við ráðherra um hvernig koma mætti höggi á Helgu Völu Helgadóttur þingmann Samfylkingarinnar.

Ætti að leggja fram upplýsingar um samskipti við skrímsladeildina

„Minnsta sem hann getur gert, ekki bara gagnvart þjóðinni og kjósendum heldur einnig gagnvart þeim sem hafa lent í þessari hakkavél Samherja er að gera hreint fyrir sínum dyrum og birta öll þessi samskipti.“

Þáttastjórnendur veltu því upp hvernig það mætti vera að samherjar Sjálfstæðisflokksins í ríkisstjórn hafi ekkert maldað í móinn með að Kristján Þór sæti sem fastast. Svona geti þetta ekki gengið? Jóhann Páll telur það vera vegna þess að þessi ríkisstjórn sé mynduð um óbreytt ástand í sjávarútvegi, óbreytt valdahlutföll í samfélaginu, að það sé hluti af dílnum.

„Veiðigjöld hafa lækkað á þessu kjörtímabili, ríkisstjórn setið hjá þegar kvóti safnast á æ færri hendur, hunsa ákall um alvöru þjóðareignarákvæði í stjórnarskrá og ekkert gert til að hrófla við þessu kerfi sem einmitt elur af sér þennan ofurauð og ofsagróða sem Samherji notar til að ráðast á fólk, sölsa undir sig völd á öðrum sviðum viðskiptalífsins, múta ráðamönnum í Namibíu.“