Kallaði McConnell heimskan tíkarson

Trump gagnrýndi McConnell harðlega fyrir að hafa ekki staðið við bakið á sér þegar forsetinn reyndi fullum fetum að snúa úrslitum forsetakosninganna í nóvember, sem hann tapaði, og fyrir það að hafa ekki stutt sig nægilega vel þegar Trump var ákærður fyrir embættisbrot.

Meðal annars kallaði Trump McConnell „heimskan tíkarson“.

Í ræðu sinni kallaði Trump eftir samstöðu meðal Repúblikana en fór einnig hörðum orðum um marga meðlimi flokksins sem hann telur ekki hafa sýnt sér nægilega hollustu og þá sérstaklega þá þingmenn sem greiddu atkvæði með því að hann yrði sakfelldur fyrir embættisbrot.

Margir öldungadeildarþingmenn Repúblikanaflokksins voru í salnum og hlustuðu á ræðu Trumps. Hann gagnrýndi McConnell fyrir að hafa ekki stöðvað staðfestingu úrslita forsetakosninganna þann 6. janúar, þegar stuðningsmenn Trumps ruddu sér leið inn í þinghúsið.

Það gerðu þeir með því markmiði að stöðva staðfestinguna og var Trump ákærður fyrir embættisbrot vegna árásarinnar.

Sjá einnig: Sakar Trump um að hafa æst til „blóðugrar uppreisnar“

„Ef þetta hefði verið Schumer [Chuck Schumer, leiðtogi Demókrata í öldungadeildinni] en ekki þessi heimski tíkarsonur Mitch McConnell, þá hefðu þeir aldrei leyft þessu að gerast. Þeir hefðu barist gegn því,“ sagði Trump um staðfestingarferlið.

Þetta var ekki í fyrsta sinn sem Trump fer hörðum orðum um McConnell.

Trump gagnrýndi einnig Elaine Chao, eiginkonu McConnels, sem var samgönguráðherra Trumps.

„Ég réð eiginkonu hans. Þakkaði hann mér nokkuð fyrir það?“ sagði Trump. Chao sagði af sér í kjölfar árásarinnar á þinghúsið og þá meðal annars vegna hegðunar Trumps þann dag.

Forsetinn fyrrverandi hæddist einnig að henni fyrir það og kallaði McConnell einnig ræfil (e. Stone cold loser), samkvæmt frétt Washington Post.

McConnell og talsmenn hans hafa ekki viljað tjá sig um ummæli Trumps.

Trump hefur ítrekað haldið því ranglega fram að umfangsmikið kosningasvindl hafi kostað hann sigur í kosningunum og ítrekaði hann það í ræðu sinni á laugardaginn. Hann sagði einnig að Mike Pence, varaforseti hans, hefði valdið sér vonbrigðum með því að reyna ekki að stöðva staðfestingu úrslitanna.

„Ég óska þess að Mike Pence hefði haft hugrekki til að senda úrslitin aftur til ríkisþinganna. Mér líkar mjög vel við hann. Ég var verulega vonsvikinn,“ sagði Trump.

Pence hafði í aðdraganda dagsins tilkynnt Trump að hann hefði ekki vald til að breyta úrslitunum.

Trump stærði sig einnig af því hve stór hópurinn hefði verið sem mótmælti við og í þinghúsinu þann 6. janúar og sagði að einhverjir mætu það svo að rúmlega milljón manns hefðu tekið þátt í árásinni, sem er ekki rétt.

Samkvæmt Washington Post lýsti Trump ekki yfir nokkurs konar iðrun vegna árásarinnar. Hvort sem er vegna hegðunar hans eða stuðningsmanna hans.

Í ræðu sinni stærði Trump sig einnig af viðbrögðum sínum við faraldri nýju kórónuveirunnar, þó hann hafi verið harðlega gagnrýndur vegna þeirra og að vel á sex hundruð þúsund Bandaríkjamenn hafa dáið vegna Covid-19.

Hann gagnrýndi Anthony Fauci, sóttvarnalækni Bandaríkjanna, og sagði hann ekki vita neitt í sinn haus.

New York Times segir Trump staðráðinn í að halda áhrifum sínum innan Repúblikanaflokksins. Hann hefur enn sterkt tak á helstu stuðningsmönnum flokksins og getur beitt þeim gegn þingmönnum og frambjóðendum flokksins. Trump hefur þegar lýst því yfir að hann muni styðja aðra frambjóðendur gegn þeim þingmönnum sem hafa ekki þóknast honum.

Hann er þar að auki sagður íhuga að bjóða sig aftur fram til forseta í kosningunum 2024 en hans helstu bandamenn draga það í efa.