Hver standa fremst með Guðjóni? „Hélt að Margrét yrði best í heimi“

Guðjón Valur Sigurðsson leggur handboltaskóna á hilluna sem einn besti íþróttamaður sem Ísland hefur átt en hvaða annað íþróttafólk á heima á lista yfir það allra besta hér á landi frá upphafi?

Ólafur Stefánsson, Bjarni Friðriksson, Vala Flosadóttir, Ásgeir Sigurvinsson, Eiður Smári Guðjohnsen Jón Páll Sigmarsson, Pétur Guðmundsson og Vilhjálmur Einarsson voru á meðal þeirra sem að sparkspekingarnir Freyr Alexandersson og Hjörvar Hafliðason nefndu þegar þeir ræddu málið á léttum nótum við Gumma Ben í Sportinu í kvöld á Stöð 2 Sport.

„Það sem gerir Guðjón Val svolítið einstakan er hvað hann var lengi á toppnum. Hann er árinu eldri en ég og hann er búinn að vera bestur eiginlega frá því að ég var tvítugur,“ sagði Hjörvar, og bætti við: „Hann „dómíneraði“ íslensku deildina og fór svo út og var alltaf markahæstur og allt þetta. Til samanburðar má nefna Eið Smára sem var magnaður en hann á kannski sjö ár. Þegar hann er þrítugur, og fer frá Barcelona til Monaco, þá er eiginlega enginn toppur eftir það miðað við hans háa standard. Ég held að það séu mjög fáir sem hafa getað þetta.“

Mjög fáir framherjar í heiminum betri

Freyr nefndi leikmann sem hann þekkir betur en flestir, markadrottninguna Margréti Láru Viðarsdóttur sem varð til að mynda þrisvar markahæst í Meistaradeild Evrópu á sínum ferli. Lærismeiðsli settu risastórt strik í reikninginn á annars mögnuðum ferli Eyjameyjarinnar:

„Ég upplifði það frá fyrstu hendi hvernig Margrét Lára var áður en hún meiddist. Þá var maður mjög mikið inni í kvennaknattspyrnunni. Það voru mjög fáir framherjar betri en hún í heiminum á þeim tíma. Hún var ekkert eðlilega góð. Svo koma þessi meiðsli. Hún var alltaf samt á toppnum en ég hélt að hún yrði best í heimi á þessum tímapunkti. Það var engin betri en hún, nema kannski Birgit Prinz en hún var líka 1,90 á hæð og spilaði eins og fullorðin gegn börnum.“

Umræðuna má sjá hér að neðan.