Til­raun til ráns gerð í Ár­bæjar­laug

Tilraun til ráns var gerð í Árbæjarlaug í gærkvöldi, rétt fyrir klukkan tíu. Þar kom kona ein inn í afgreiðslu laugarinnar og ógnaði starfsfólkinu um leið og hún heimtaði peninga. Konan flúði síðan af vettvangi áður en orðið var við kröfum hennar.

Í skeyti frá lögreglu segir að þegar verið var að leita að konunni í hverfinu hafi komið tilkynning frá heimili í grenndinni þar sem kona hafði farið inn í forstofu og stolið þaðan bíllyklum.

Húsráðandi náði að stöðva för konunnar þegar hún var komin inn í bifreið hans og var hún handtekin.

Í dagbók lögreglu segir einnig frá því að skömmu eftir klukkan eitt í nótt hafi verið tilkynnt um þjófnað í hverfi 101 í Reykjavík. Erlendir ferðamenn höfðu þar verið með bakpoka sinn á veitingahúsi í miðborginni og var pokinn eftirlitslaus um skamma stund.

Þá hafði maður farið í pokann og stolið þaðan áfengisflösku og greiðslukortum. Atvikið náðist á eftirlitsmyndavél.