Stjórnvöld hunsa ráðleggingar sérfræðinga um sykur- og alkóhólneyslu

Umrædd viðmið um ráðlagða dagskammta eru uppfærð á fimm ára fresti, síðast í gær. 

Það vakti athygli að ýmis viðmið stóðu óbreytt, þrátt fyrir ráðleggingar sérfræðinga. Þeir höfðu til dæmis lagt til að hlutfall viðbætts sykurs yrði minnkað úr tíu prósentum daglegra hitaeininga í sex prósent. Það var ekki gert.

Þá var mælt með því að karlmönnum yrði ráðlagt að neyta aðeins eins áfengs drykkjar á dag, líkt og konum, en viðmiðið er enn tveir drykkir.

Hin nýju en lítt endurbættu viðmið hafa verið harðlega gagnrýnd, meðal annars fyrir að taka ekki tillit til þátta á borð við Covid-19 faraldursins eða ábendinga vísindamanna um að ráðleggingarnar taki mið af þáttum á borð við fæðuöryggi og langvarandi sjúkdóma.

Undir tveggja ára eiga ekki að fá viðbættan sykur

Í tillögum sínum benti ráðgjafanefndin meðal annrs á að viðbættur sykur ætti þátt í þyngdaraukningu og offitu, sem hefðu verið tengd við langvarandi sjúkdóma á borð við áunna sykursýki.

Meira en tveir þriðjuhlutar fullorðinna Bandaríkjamanna eru í yfirþyngd eða þjást af offitu en offita og áunnin sykursýki eru meðal áhættuþátta alvarlegra veikinda í kjölfar Covid-19 smits.

Það sem er nýtt í ráðleggingunum er að í fyrsta sinn er tekið fram að börn undir tveggja ára aldri ættu ekki að neita viðbætts sykurs en hann er að finna í ýmsum matvælum sem börnum eru gefin, til að mynda morgunmat og safadrykkjum.

Ráðleggingarnar eru ekki bara bókstafur á pappír heldur hafa þær ýmis áhrif á daglegt líf. Skólamáltíðir eru til dæmis hannaðar í kringum þær og þá hafa þær áhrif á útgáfu matarmiða fyrir fátæka.