Repúblikanar pirraðir yfir áhugaleysi Trumps

Repúblikanar hafa ítrekað kallað eftir því að Donald Trump, forseti, hjálpi þeim í kosningabaráttunni fyrir aukakosningarnar til öldungadeildarinnar í Georgíu. Hann hefur þó hvorki tjáð sig um kosningarnar né stefnir hann á að fara til Georgíu og taka þátt í baráttunni. Baráttan um þessi tvö þingsæti mun ráða því hvaða flokkur nær meirihluta í öldungadeildinni.

Kosningarnar eru því gífurlega mikilvægar og bæði Mike Pence varaforseti og Barack Obama, fyrrverandi forseti, hafa sett stefnuna á Georgíu og ætla að ræða við kjósendur. Þá hafa bakhjarlar bæði Repúblikana- og Demókrataflokksins dælt peningum í kosningabaráttuna.

Samkvæmt frétt Politico hefur Trump þó ekki sýnt þessum kosningum í Georgíu áhuga. Fyrir utan nokkur tíst um meint kosningasvindl hefur hann ekki minnst á ríkið.

Kosningarnar munu fara fram þann 5. janúar. Þær verða haldnar þar sem enginn fékk meirihluta atkvæða í kosningunum í síðustu viku. Báðir sitjandi öldungadeildarþingmenn Georgíu eru Repúblikanar. Þau heita David Perdue og Kelly Loeffler og hafa verið mjög gagnrýnin á það hvernig kosningarnar fóru fram í Georgíu. Embættismenn segja þó gagnrýni þeirra ekki réttmæta.

Sjá einnig: Ætla að telja öll atkvæði Georgíu aftur

Demókratarnir Raphael Warnock og Jon Ossoff fara gegn þeim. Takist Demókrötum að velta bæði Purdue og Loeffler úr sessi verða þeir með fimmtíu sæti í öldungadeildinni, líkt og Repúblikanar. Hvorugur flokkurinn nær þannig meirihluta en þegar svo er heldur varaforsetinn, í þessu tilfelli Kamala Harris, á úrslitaatkvæði.

„Nokkrir hafa sagt honum að það sé mjög mikilvægt að Loeffler og Perdue vinni því þau muni hjálpa við að halda arfleið hans gangandi. Við höfum bent honum á að Repúblikanar tóku arfleið Obama hægt og rólega í sundur meðan við höfum stjórnað öldungadeildinni og nái Demókratar tökum þar muni þeir gera það sama við Trump,“ sagði einn heimildarmaður Politico sem er sagður náinn Trump.

Hann bætti við að ásakanir Trump um kosningsvindl væru að koma niður á trúverðugleika hans.

Sjá einnig: Opin­ber eftir­lits­nefnd segir for­seta­kosningarnar í Banda­ríkjunum hafa verið þær öruggustu í sögunni

Auk þess að hafa sýnt kosningabaráttunni í Georgíu lítinn áhuga, virðist Trump ekki sýna starfi sínu mikinn áhuga þessa dagana. Hann hefur einungis einu sinni sést opinberlega undanfarna viku. Það var um helgina þegar hann tók þátt í athöfn í kirkjugarði hermanna í Arlington. Þá sagði hann ekki orð við almenning eða fjölmiðla. Óljóst er hvenær hann mun næst koma fram opinberlega.

Washington Post bendir á að sex bandarískir hermenn við friðargæslu hafi dáið í þyrluslysi í Egyptalandi í gær. Óveðrið Eta hafa náð landi í Flórída og að útbreiðsla nýju kórónuveirunnar hafi náð hámarki í Bandaríkjunum og valdið lækkunum á hlutabréfamörkuðum.

Þrátt fyrir það hefur Trump varið mest öllum sínum tíma einn í Hvíta húsinu þar sem hann hefur tíst ósönnuðum fullyrðingum og áróðri um kosningarnar og gagnrýni á Fox News.