Segir barnið upplifa að ofbeldið sem það lenti í hafi ógnað lífi þess

Í síðasta þætti af Fósturbörnum sagði Guðrún frá því að hún hefði misst börnin sín þrjú vegna ásakana um ítrekað ofbeldi.

Guðrún kláraði viðskiptafræði í einum virtasta háskóla Kaupmannahafnar, var ekki óreglumanneskja en missti samt sem áður tökin.

Hún fær lítið að hitta börn sín og er ekki sátt en í þættinum í kvöld fá áhorfendur að kynnast fósturforeldrum tveggja barna hennar og heyra þeirra hlið sem er töluvert önnur en Guðrúnar.

„Hún hefur lent í margra ára vanrækslu og andlegu og líkamlegu ofbeldi, og eiginlega öllu því sem við viljum að börn lendi ekki í,“ segir fósturmóðir dóttur Guðrúnar.

„Þetta gekk mjög langt og barnið sjálft upplifir að það ofbeldi sem hún hafi einstaka sinnum lent í hafi ógnað lífi hennar. Þegar hún kemur til mín þá kemur hún með þannig áverka að maður trúði þeirri sögu mjög vel. Hún var með handaáverka á hálsi eins og hafi verið þrengt að öndunarvegi og sprungnar æðar í augunum og bara ofboðslega illa farin.“