„Erum ekkert endilega sérlega gott bisnessfólk“

Tjöruhúsið á Ísafirði opnar aftur eftir snarpa lokun staðarins. Óhætt er að fullyrða að þau tíðindi gleðja margan matgæðinginn sem er á Vestfjörðum og/eða á leið þar um en veitingastaðurinn hefur verið afar vinsæll nú árum saman. Vísir hefur fyrir því heimildir að foringjar ríkisstjórnarinnar, þau Katrín Jakobsdóttir og Bjarni Benediktsson, hafi bæði snætt í Tjöruhúsinu í sumar og Katrín oftar en einu sinni. Bara svo dæmi sé nefnt.

„Jájá, við opnum ef þau hjá skattinum taka þessi gögn okkar til greina. Okkur finnst gaman að gefa fólki að borða og fólki virðist finnast gott að borða hér,“ segir Haukur S. Magnússon á hinum víðfræga og rómaða veitingastað Tjöruhúsinu á Ísafirði.

Vilja ekki standa í stælum við skattinn

Frá því var greint að útsendari Ríkisskattstjóra hefði lagt leið sína á Ísafjörð í vikunni sem var, reyndar á föstudegi, og lokað staðnum. Innsiglað. Tjöruhúsið er rekið af þeim Hauki og svo Magnúsi Haukssyni föður hans og fjölskyldunni allri.

Ástæðurnar fyrir aðgerðum skattsins, sem þeim feðgum þykja heldur harkalegar ekki síst í ljósi þess að veitingastaðir landsins alls eiga nú margir undir högg að sækja vegna Covid-faraldursins, eru nokkrar. En þeir taka jafnframt skýrt fram að þeir efist ekki um að skattayfirvöld hafi verið í fullum rétti. Og þeir hafa engan hug á að standa í stælum við skattinn.

Að sögn þeirra var það svo að skatturinn vildi fá upp sjálfvirkt kassakerfi, sem reyndar sé ekki áskilið lögum samkvæmt en þeir urðu við því. Og auk þess var um að ræða vanskil á margvíslegum gögnum, bæði gögnum sem skattayfirvöld telja sig eiga rétt á að fá og „hafa ekki fengið, og eins gögnum sem okkur ber lögum samkvæmt að standa skil á og höfum vanrækt af ýmsum ástæðum.“

Ástæður lokunarinnar

„Taka ber fram að ekki er um að ræða vangreiðslur á opinberum gjöldum eða skil á virðisaukaskatti eða öðrum rekstrargjöldum, í versta falli seingreiðslur. Þau gögn sem komin eru yfir skilafrest - og yfirleitt hafa skilafrest - teljast um einum og hálfum mánuði of sein,“ segir Haukur.

Hann segir að þeim gögnum sem þeim bar að skila hafi nú verið skilað enda hafi aldrei nokkuð annað staðið til. Og hann tíundar hvað það var sem útaf stóð:

-Afrit af ráðningarsamningum við starfsmenn -Afrit af launaseðlum fyrir júnímánuð, auk afrita af vinnuskýrslum og vaktaplönum

-„Endurbættar skilagreinar“ fyrir júnímánuð, vegna meintra ágalla, auk skilagreina júlímánaðar. -Að laun eins starfsmanns úr fjölskyldunni séu hækkuð í samræmi við viðmiðunarmörk (sem fela m.a. í sér að starfsmaður sé á fullum launum árið um kring, þrátt fyrir að starfsemin liggi niðri stóran hluta árs)

„Við erum ekkert endilega sérstaklega gott bisnessfólk.

Við erum meira svona gleðifólk, okkur finnst gaman að elda og fá fólk í mat.

Áherslur hjá okkur eru meira veitingalegs- en rekstrarlegs eðlis. Auðvitað væri gott ef við værum með einhvern MBA-mann hér til að sjá um rekstrarhliðina en svona er þetta,“ segir Haukur.

Bjuggust ekki við svo harkalegum aðgerðum

En þeir feðgar og allt þeirra fólk eru þó ekki meiri slúbbertar en svo að þeim hefur tekist að reka Tjöruhúsið nú í um 15 ár á sömu kennitölunni. Fátítt í þeim geira og bendir til þess að þar fari fólk sem vilja hafa sitt á þurru landi.

Þeir bjuggust því ekki við þessu en svo óheppilega vildi til að þegar skatturinn krafðist viðbragða var enginn til svara. Eins og segir í yfirlýsingu á Facebook-vegg Tjöruhússins var Magnús, sem hefur verið í forsvari fyrir staðinn, upptekinn að stunda villimennsku á ströndum í félagi við frændur og vini, án farsíma.

„Kröfurnar eru skiljanlegar,“ segir Haukur. Og hann segir það eðlilegt að skatturinn vilji steypa fólki og fyrirtækjum í sama mótið. Rekstur Tjöruhússins er hins vegar tiltölulega flókinn. Þar er aðeins opið yfir sumartímann og starfsmannafjöldinn, en starfsmenn eru fjölskylda og vinir, rokkar frá því að vera tveir og upp í 12.

Mæta alltaf á föstudögum með borðann

Magnús segir að málið standi ekki um það að veitingahúsið hafi ætlað að halda frá skattinum stórum fjárhæðum, alls ekki. 

Tjöruhúsinu var einnig lokað árið 2013, þá vegna tittlingaskíts sem útaf stóð, að sögn Magnúsar, einhverjum 300 þúsund krónum í staðgreiðsluskatt. Þá var einnig lokað á föstudegi, þá mætti fulltrúi skattayfirvalda með límborðann sem kom sér heldur illa fyrir reksturinn.

En þeir feðgar taka þessu sem hverju öðru hundsbiti og ekki nokkur uppgjafartónn þar á bæ. Velunnarar Tjöruhússins geta því tekið gleði sína á ný; ekki er úr myndinni að njóta veitinga þar þegar fram líða stundir, eftir sem áður.