Steyttu hnefa og krupu jafn lengi og lög­­reglu­­maðurinn kraup á hálsi Floyd

MLS-deildin fór aftur af stað í gær með Orlando City og Inter Miami. Orlando vann leikinn 2-1 en það sem vakti mesta athygli voru mótmæli leikmanna beggja liða fyrir leik.

MLS-deildin í fótbolta hófst í Bandaríkjunum í febrúar síðastliðnum. Eftir aðeins tvær umferðir þurfti að fresta deildinni vegna kórónufaraldursins. Nú er deildin loks farin aftur af stað en þó með breyttu sniði en áður.

Líkt og NBA-deildin í körfubolta verður leikið í Disney World í Orlando þar sem kórónufaraldurinn virðist enn lifa góðu lífi í Bandaríkjunum.

Sky Sports greindi frá. 

Fyrir leik steyttu leikmenn beggja liða hnefa í loftið – til heiðurs Tommie Smith og John Carlos – á meðan aðrir krupu. Alls tóku 200 leikmenn deildarinnar þátt í mótmælunum sem var ætlað að minna á það óréttlæti sem litað fólk þarf að þola í Bandaríkjunum dag frá degi.

„Svartur og stoltur“ og „Þögn er ofbeldi“ var meðal þess sem stóð á stuttermabolum sem margir leikmenn klæddust yfir treyjur sínar fyrir leikinn.

Mótmælin stóðu yfir í átta mínútur og 46 sekúndur eða jafn lengi Thomas Lane, lögreglu-maðurinn sem myrti George Floyd. kraup á hálsi hans fyrr á þessu ári. 

„Þetta er tækifæri fyrir okkur til að sýna að við stöndum saman. Með þessu getum við látið í okkur heyra og MLS-deildin hefur sýnt að hún stendur við bakið á okkur með því að leyfa okkur að mótmæla,“ sagði Justin Morrow, leikmaður Toronto FC og framkvæmdastjóri samtakanna „Svartir leikmenn fyrir breytingar,“ (e. Black Players for Change).

Alls eru 170 svartir leikmenn MLS-deildarinnar í samtökunum sem voru stofnuð til að gefa leikmönnum rödd út á við og stuðla að breytingum bæði innan MLS sem utan.

Hvað leik Orlando og Inter Miami varðar þá vann Orlando mjög dramatískan 2-1 sigur. Luis Nani, fyrrum leikmaður Manchester United og portúgalska landsliðsins, reyndist hetja Orlando. Hann lagði upp jöfnunarmark þeirra á 70. mínútu og skoraði svo sigurmarkið þegar sjö mínútur voru komnar fram yfir venjulegan leiktíma.

Hetjan fékk svo heiðursskiptingu í kjölfarið. 

Sigur Orlando þýðir að liðið er nú á toppi riðilsins en MLS-deildin verður með breyttu sniði í ár. Leikið er í sex riðlum og efstu tvö liðin í hverjum riðli fara áfram í 16-liða úrslit. Þau fjögur lið sem verða  með besta árangurinn af þeim sex sem enda í 3. sæti fara einnig áfram í útsláttarkeppnina.

Leikið er fyrir luktum dyrum í Disney World í Flórída. FC Dallas er eina lið deildarinnar sem vildi ekki taka þátt í keppninni sem fram fer frá 8. júlí til 11. ágúst.

Guðmundur Þórarinsson og félagar hans í New York City FC hefja leik í dag en þeir mæta Philadelphia Union klukkan 13:00 að íslenskum tíma.