Hver og einn fer á sínum hraða í fjölskyldugöngu Ljóssins

Árleg fjölskylduganga Ljóssins fer fram á morgun en hún er hluti af áherslu Ljóssins á líkamlega endurhæfingu. Eins og oft áður er gengið upp Esjuna. 

„Lögð er áhersla á að gangan er fyrir alla Ljósbera, ættingja þeirra og vini,“ segir Guðrún Erla Þorvarðardóttir íþróttafræðingur hjá Ljósinu í samtali við Vísi.

„Við viljum hvetja til heilbrigðs lífstíls og að fólk taki þátt á sínum forsendum, fari eins langt og það treystir sér. Það getur verið allt frá því að mæta á svæðið og upplifa stemninguna, ganga rétt upp í hlíðarnar og allt upp í að ná alla leið upp að steini.“

Gengið er upp Esjuna og þátttaka er öllum að kostnaðarlausu.

„Ljósið verður með tjald á bílastæði vestan við Esjustofu. Upphitun verður stýrt af þjálfurum Ljóssins og lagt af stað á fjallið klukkan 11.“

Starfsfólk Ljóssins mun að venju dreifa sér um hlíðarnar og vera til aðstoðar ef þörf er á. 

„Klæðið ykkur eftir veðri og gott er að hafa drykkjarvatn og göngustafina með,“ segir í tilkynningu um gönguna.

„Ljósið er á sínu 15 starfsári. Þar er lögð áhersla á heildræna endurhæfingu fyrir krabbameinsgreinda og aðstandendur þeirra. Allir sem koma í Ljósið fá viðtöl við fagaðila sem aðstoða og leiðbeina við líkamlega og andlega endurhæfingu. Í boði eru ýmis sérhæfð námskeið, fræðsla, jafningahópar og handverk. Við viljum hvetja alla krabbameinsgreinda og aðstandendur þeirra til að nýta sér fjölbreytta þjónustu Ljóssins. Allar nánari upplýsingar á www.ljosid.is,“ segir Guðrún Erla að lokum.