Kasólétt Anníe Mist skellti upp úr eftir nokkrar alvöru lyftur

Íslenska CrossFit drottningin Anníe Mist Þórisdóttir ætlar að æfa af krafti alla meðgönguna og hún leyfir aðdáendum sínum líka að fylgjast með á samfélagsmiðlum.

Í nýjasta myndbandinu sínum má sjá Anníe Mist reyna sig við réttstöðulyftu. Það kemur ekki fram hvað hún er að lyfta þungu en það vantar sýnilega ekki lóðin á stöngina.

Það fer ekkert á milli mála að bumban er farin að stækka hjá Anníe Mist en hún lætur það ekkert stoppa sig í lyftingarsalnum.

Það er alveg ljóst að það eru ekki allir sem lyfta slíkum þyngdum hvað þá konur að verða komnar fimm mánuði á leið.

Anníe Mist er að vanda með léttleikann að leiðarljósi og það má líka sjá það í þessu myndbandi.

Hún skellir upp úr eftir lyfturnar og kærastinn hennar Frederik Ægidius hafði líka mjög gaman af þessu eins og sjá má hér fyrir neðan.