Kvöldfréttir Stöðvar 2

Stjórnarþingmönnum fækkaði um einn í dag þegar Andrés Ingi Jónsson sagði sig úr Vinstri hreyfingunni grænu framboði.  Hann segir æ meira hafa skilið á milli hans og annarra þingmanna flokksins að undanförnu og ætlar að starfa utan flokka. Fjallað verður um þetta og rætt við Andrés og Katrínu Jakobsdóttur, forsætisráðherra, í fréttum Stöðvar tvö klukkan hálf sjö.

Þar kynnum við okkur líka frumvarp félagsmálaráðherra um hlutdeildarlán sem ríkið mun veita kaupendum húsnæðis sem eiga í erfiðleikum með að fjármagna útborgun og fjöllum um hráefnisskort sem byggðir og fiskvinnsluhús finna gjarnan fyrir þegar komið er fram á vetur. Loks skoðum við hugmyndir fjárfesta sem vilja reisa kláfalyftu á Ísafirði fyrir tvo og hálfan milljarð króna.

Þetta og margt fleira í fréttum Stöðvar 2 klukkan 18.30.