Geðs­hræring á Al­þingi vegna tví­bókunar þing­manna

Öll gjöld sem ríkið leggur á eins og eldsneytisgjald, áfengisgjald og önnur gjöld hækka um 2,5 prósent milli ára samkvæmt bandormsfrumvarpi fjármálaráðherra sem hann mælti fyrir á Alþingi í dag. Ýmis ný gjöld verða tekin upp í umhverfismálum.

Nokkurrar geðshræringar gætti meðal þingmanna stjórnarandstöðunnar í umræðum um fundarstjórn forseta á Alþingi í dag áður en umræður um bandorminn, tekju- og gjaldafrumvörp ríkisstjórnarinnar, hófust þar sem samgönguráðherra hafði boðað þingmenn höfuðborgarsvæðisins á fund í ráðuneytinu um veggjöld á sama tíma.

Til nokkurra orðahnippinga kom milli Þorgerðar Katrínar Gunnarsdóttur formanns Viðreisnar og Steingríms J. Sigfússonar forseta Alþingis vegna þessa.

„Af hverju í ósköpunum getur ríkisstjórnin ekki skipulagt sig betur og meira í samvinnu og af virðingu við Alþingi Íslendinga?“ spurði Þorgerður Katrín í ræðustól og bætti við.

„Það er verið að boða fund núna á eftir upp í ráðuneyti sem gengur út á að hækka skatta á suðvesturhornið. Er verið að reka okkur þingmenn suðvesturhornsins frá þinginu á meðan? Ég spyr af hverju?“ spurði Þorgerður Katrín rétt áður en hún yfirgaf ræðustólinn.

Steingrímur tók þá til máls. „Forseti mælist nú til þess að skattamálin verði rædd þegar þau eru á dagskrá hér á eftir.“

„Forseti segir mér ekki hvað á að ræða,“ kallaði Þorgerður Katrín fram í utan úr þingsal.

„Það fellur tæplega undir fundarstjórn forseta að fara út í efnislega umræðu um skatta.....“

„Ég vil fá það skriflegt,“ kallaði Þorgerður Katrín og við það fauk nokkuð í Steingrím sem byrsti róminn.

„Forseti stendur ekki í orðaskiptum við þingmenn. Forseti segir það sem hann vill segja og Þingmenn hlusta,“ sagði Steingrímur og sló í bjölluna. Hann tilkynnti síðar að fundi samgönguráðherra með þingmönnum hefði verið frestað um óákveðinn tíma og umræður um bandorminn og önnur mál sem tengjast fjárlögum hófust síðan að loknum umræðum um störf þingsins.

Öll gjöld ríkisins hækka um 2,5%

Í framsögu sinni fór Bjarni Benediktsson fjármálaráðherra yfir helstu breytingar á gjalda- og tekjuhlið fjárlaga sem og þær skattkerfisbreytingar sem ríkisstjórnin boðar. Ýmis gjöld hækkuðu ekki umfram 2,5 prósent í samræmi við yfirlýsingu stjórnvalda við gerð kjarasamninga á almennum markaði.

En ýmis ný gjöld verða einnig lögð á eins og urðunargjald. Ágúst Ólafur Ágústsson þingmaður Samfylkingarinnar sagðist ekki sjá að afnám krónu á móti krónu gagnvart öryrkjum væri fjármagnað í frumvarpinu.

„Þá langar mig að kalla eftir svörum frá ráðherra hvort það standi ekki enn þá til að afnema krónu á móti krónu í tilviki öryrkja,“ sagði Ágúst Ólafur.

Bjarni minnti á að sérstök framfærsluuppbót til öryrkja hafi verið leidd í lög fyrir tilstuðlan Jóhönnu Sigurðardóttur fyrrverandi formanns Samfylkingarinnar fyrir þá sem höfðu úr engu öðru að spila en berstrípuðum bótum almannatrygginga. Sá hluti bóta hafi verið skertur krónu á móti krónu vegna tekna.

„Og þegar menn tala um að það eigi að afnema krónu á móti krónu skerðinguna verða menn auðvitað að spyrja; á að hætta með sérstöku framfærsluuppbótina eins og hún var hugsuð í upphafi eða ekki. Það er það sem hefur tafið endurskoðun þessa máls,“ sagði Bjarni en félagsmálaráðherra væri að vinna að því að ná samkomulagi um framtíðarskipan þessara mála við öryrkja.