Emil: Vona að þetta skýrist eftir landsleikina

Emil Hallfreðsson lék í hálftíma fyrir íslenska liðið í dag og var ánægður í leikslok. Hann sagðist vonast til að hans mál skýrist eftir landsleikjahrinuna en hann er sem kunnugt er án félags.

„Þetta gekk nokkuð vel upp miðað við hvernig þetta var lagt upp. Við ætluðum að taka þrjú stig og ég held að við séum nokkuð sáttir.“

„Við byrjuðum svolítið hægt í báðum hálfleikum, svo fannst mér við setja í næsta gír og gerðum það sem dugði til að taka sigur.“

Moldóva er í 171. sæti á Fifa-listanum og því ljóst að allt annað en sigur í dag hefðu verið vonbrigði.

„Ég átti von á að þetta yrði hörkuleikur en var nokkuð meðvitaður um að ef við ættum góðan dag þá myndum við taka þrjú stig. Við erum það reynslumikill hópur að við erum ekki að fara í einhvern leik þar sem við vanmetum andstæðinginn.“

„Við berum virðingu fyrir þeim og tökum á þeim 100%. Við vitum að við erum engin undur þannig að ef við ætlum að vinna okkar leiki þá verðum við að gefa okkur alla í verkefnið.“

„Við vissum að þetta yrði þolinmæðisdæmi í dag. Við komumst í 1-0 og þá vinnur tíminn með okkur. Þetta gekk nokkuð vel. Þetta var gaman, það er þægilegt þegar það er rigning og svona toppaðstæður.“

Emil er samningslaus eins og er en vildi lítið segja um hans mál og hvert yrði hans næsta félag.

„Ég ætla að tækla það eftir þessa landsleiki. Ég hef lagt þessi mál algjörlega til hliðar þessa vikuna og ætla að einbeita mér 100% að þessu verkefni og vona að þetta skýrist fljótlega eftir landsleikina.“

„Þetta er pottþétt góð auglýsing, ég veit að ef ég spila og fólk sér mig þá hjálpar það klárlega með mína stöðu og ég er mjög þakklátur fyrir að fá að spila hálftíma í dag,“ sagði Emil að lokum