Kosningastjóri Obama segir heiðarleika lykilinn að árangursríkri kosningabaráttu

Roger Fisk, fyrrverandi kosningastjóri Baracks Obama, segir heiðarleika vera lykilinn að árangursríkri kosningabaráttu. Hann vill ekki gefa upp hver úr röðum Demókrata hann telur líklegastan til að hafa betur en Donald Trump í forsetakosningunum í Bandaríkjunum 2020.

Fisk var einn af lykilmönnunum í kosningabaráttu Obama í bæði skiptin sem hann bauð sig fram en hann telur að enn eigi fleiri eftir að bætast í hóp þeirra sem sækjast eftir tilnefningu Demókrataflokksins. 

„Lykillinn er að vita nákvæmlega hver maður er, nákvæmlega hverju maður vill koma á framfæri og byggja síðan upp hreyfingu sem endurspeglar það, byggja upp sýnileika á samfélagsmiðlum sem magnar upp þessi grunngildi,“ segir Fisk í samtali við fréttastofu.

Fjölmargir hafa þegar lýst því yfir að þeir sækist eftir tilnefningu demókrataflokksins og má þar meðal annars nefna Bernie Sanders, Kirsten Gillibrand, Elisabeth Warren og Cory Booker. Joe Biden, fyrrverandi varaforseti Bandaríkjanna, hefur verið nefndur sem einn líklegasti kandídatinn, en nýlegar ásakanir gegn honum um ósæmilega hegðun gegn konum gætu sett strik í reikninginn.

Sjá einnig: Biden segist ekki telja að hegðun hans sé óviðeigandi

„Ég held að sviðið sé ekki fullskipað enn, ég held að þrír eða fjórir muni bætast í hópinn. Margir bíða eftir að sjá hvað Biden, fyrrverandi varaforseti gerir. Svo ég ætla að bíða með að dæma um það þangað til kannski í maí. Þá held ég að allir verði komnir fram og þá getum við svarað þessu,“ segir Fisk, spurður hver hann telji líklegastan til að standa uppi sem sigurvegari í forkosningum Demókrata. Hann telji þó fjóra til fimm vera líklega til að standa sig vel.

Hann kveðst eiga vona á spennandi kapphlaupi um það hver muni mæta Donald Trump í kosningunum á næsta ári. „Mér finnst nokkuð ljóst að núverandi forseti hefur byggt „vörumerki“ sitt á fortíðarþrá og gærdeginum. „Gerum Bandaríkin stórkostleg aftur.“ Það þýðir að það sé einhver goðsagnatími í fortíðinni en ég veit ekki hvænær það var. En það mikilvæga fyrir okkar fólk er að við veljum einhvern sem hefur skýra framtíðarsýn,“ segir Fisk.

Gjörólík kosningabarátta 2012 en 2008

Hann segir mikinn mun hafa verið á þeim kosningabaráttum sem hann stýrði fyrir kosningarnar 2008 og 2012. Margt breyttist í millitíðinni. „Í fyrstu herferðinni vorum við að sækjast eftir einhverju. Við vorum að kynna Barack Obama fyrir Bandaríkjunum,“ útskýrir Fisk. „Seinni herferðin byggði á því hvernig kjörtímabilið á undan hafði gengið, hvað gekk vel, hvað gekk illa og hvernig við gátum gert því sem vel var gert hátt undir höfði.“

Þá hafi tæknibreytingarnar sem urðu í millitíðinni haft gríðarlega mikil áhrif. „Snjallsíminn kom út í júlí eða ágúst 2008 svo þegar komið var að annarri kosningaherferðinni höfðu langflestir Bandaríkjamenn algjörlega fjarlægst það sem við áður þekktum við notkun internetsins fyrir framan tölvuskjáinn eins og ég ólst upp við. Nú var það orðið háðara snjallsímanum þegar kom að því að nálgast fréttir og hegðun almennt á netinu.“