Þjóðaratkvæðagreiðsla heldur ekki í boði hjá Corbyn

Jafnvel þótt boðað yrði til kosninga í Bretlandi - og Jeremy Corbyn myndi leiða Verkamannaflokkinn til sigurs - myndi hann ekki leyfa bresku þjóðinni að greiða atkvæði um Brexit að nýju. Þetta segir Corbyn í einkaviðtali hjá Guardian.

Leiðtogi Verkamannaflokksins vill að þingið fái að greiða atkvæði um Brexit-sáttmála Theresu May – sem hann veit að breska þingið mun kolfella – og boða sem fyrst til þingkosninga og freista þess í kjölfarið að fá umboð þjóðarinnar til að semja um hagstæðari samning við Evrópusambandið.

Leiðtogi Verkamannaflokksins vill tollabandalag við Evrópusambandið og náið samband við hinn ábatasama innri markað Evrópusambandsins. Þetta segir Corbyn þrátt fyrir að leiðtogar Evrópusambandsríkja hafi þvertekið fyrir að semja upp á nýtt.

Corbyn hefur sínar efasemdir um reglur sambandsins um ríkisstyrki og segist þurfa að horfa til allra sjónarmiða í flokknum og taka tillit til þeirra sem vilja eindregið segja sig úr stærstu viðskiptablokk heimsins.

Hann segir að það sé þjóðinni fyrir bestu að þingið fái að greiða atkvæði um Brexit-sáttmála Theresu May sem fyrst.