Hjálpar ekkert að detta út úr Meistaradeildinni

Detti Liverpool út úr Meistaradeild Evrópu mun það ekki hjálpa liðinu í titilbaráttunni í ensku úrvalsdeildinni. Þetta segir varnarmaðurinn Virgil van Dijk.

Hollendingurinn segir hóp Liverpool nógu sterkan til þess að berjast á báðum vígstöðvum og skorar á samherja sína að mæta með kassann út í leikinn gegn Napólí á Anfield í kvöld.

Liverpool verður að vinna leikinn, annað hvort 1-0 eða ef Napólí nær að skora þá þarf munurinn að vera að minnsta kosti tvö mörk, til þess að komast áfram upp úr riðlakeppni Meistaradeildarinnar.

Um helgina komst Liverpool á toppinn á ensku úrvalsdeildinni, eina liðið sem er ósigrað eftir að Manchester City tapaði fyrir Chelsea. Stuðningsmenn Liverpool þrá að vinna Englandsmeistaratitilinn að nýju, í fyrsta skipti síðan 1990, og hefur skapast umræða um að kannski sé betra fyrir liðið að detta út úr Meistaradeildinni og geta einbeitt sér að úrvalsdeildinni.

„Ég held að þeir sem segi það séu ekki stuðningsmenn Liverpool,“ sagði van Dijk við The Times.

„Við viljum berjast á meðal þeirra bestu. Við erum efstir í deildinni núna en það gæti breyst í næstu viku.“

„Við verðum að halda áfram að spila eins vel og við getum og gefa allt í það að komast upp úr riðlinum.“

„Þegar ég horfi á hópinn er ég viss um að liðið geti barist á tveimur vígstöðvum. Við eigum enn eftir að sanna það, en vonandi fáum við tækifæri til þess.“

Leikur Liverpool og Napólí hefst klukkan 20:00 og er í beinni útsendingu á Stöð 2 Sport 2.