„Firmino þarf ekki augað til að spila“

Roberto Firmino tryggði Liverpool sigur á PSG í Meistaradeild Evrópu á þriðjudagskvöld. Mikil óvissa var með þátttöku hans í leiknum vegna augnmeiðsa.

Firmino fór meiddur af velli í leik Liverpool og Tottenham um helgina og æfði ekki með Liverpool daginn fyrir leik. Hann var settur á bekkinn gegn PSG en kom inn í seinni hálfleik og skoraði dramatískt sigurmark í uppbótartíma.

Liðsfélagi hans, Sadio Mane, segist hafa kvatt Firmino til þess að spila.

„Ég held hann þurfi ekki augað á sér til þess að spila svo ég sendi honum skilaboð á mánudag og sagði að við þyrftum á honum að halda,“ sagði Mane eftir leikinn.

„Þið hafið öll séð mörkin sem hann skorar án þess að horfa svo ég held hann þurfi ekki augað á sér til þess að spila.“

Liverpool komst 2-0 yfir í leiknum en PSG náði að jafna metin undir lok leiksins áður en Firmino tryggði heimamönnum sigurinn á 92. mínútu leiksins.

„Þetta eru stór úrslit og mjög mikilvægt fyrir okkur að halda áfram að ná í góð úrslit.“

„PSG er eitt besta lið heims en við spiluðum vel og áttum skilið að vinna,“ sagði Sadio Mane.