Allegri um rauða spjaldið: VAR hefði hjálpað dómaranum

Cristiano Ronaldo hefði ekki fengið rautt spjald ef myndbandsdómgæsla væri í Meistaradeild Evrópu. Þetta segir þjálfari Juventus, Max Allegri.

Ronaldo var rekinn út af eftir aðeins hálftíma leik í viðureign Valencia og Juventus í Meistaradeildinni í gærkvöld.

Dómari leiksins gaf Ronaldo rautt spjald eftir að hafa ráðfært sig við sprotadómarann fyrir aftan mark Valencia.

„Það eina sem ég get sagt er að VAR hefði hjálpað dómaranum með þessa ákvörðun,“ sagði Allegri um rauða spjaldið eftir leikinn.

„Að fara niður í 10 menn í Meistaradeildinni fyrir atvik eins og þetta er mjög svekkjandi.“

Ronaldo missir af næsta leik Juventus við Young Boys.