Grét þegar hann sá Dorrit og Ólaf Ragnar á fremsta bekk

Ari Ólafsson verður annar á svið á fyrra undankvöldi Eurovision sem fram fer í Lissabon Í Portúgal í byrjun maí.

Þá flytur hann framlag Íslands, Our Choice, í Altice-höllinni þann 8. maí. Ásgeir Erlendsson vakti Ara á dögunum og kynntist honum í þættinum Ísland í dag á Stöð 2.

„Ég byrja daginn  í raun á því að svara tölvupóstum. Ég fékk til að mynda spurningar sendar frá einhverri bloggsíðu í Bretlandi og þurfti að svara þeim. Ég er með svona Google docs skjal með svörum sem ég nota í raun bara. Ég þarf kannski aðeins að laga þetta til en þetta eru nánast alltaf sömu spurningarnar,“ segir Ari.

Ari lék í Oliver Twist hér á landi aðeins 11 ára.

„Ég fór einmitt að gráta á frumsýningunni þar líka. Þá voru Dorrit og Ólafur Ragnar, forseti, á fremsta bekk og ég fór bara að hágráta þegar ég sá þau. Ég var búinn að byggja upp voðalega spennu að forsetinn væri að koma á frumsýninguna. Þá var ég fyrst stressaður og fékk fyrsta kvíðakastið fyrir sýningu. Svo þegar ég átti að syngja lagið Hvar er ást, sem er aðal sóló lag Oliver Twist, þá grét á óstöðvandi allt lagið og yfir í næsta atriði.“

Ari segir að draumurinn sé að geta lifað á söng.

„Svo lengi sem ég get lifað á söng, átt konu og börn, þá er ég ánægður. Mig langar alveg að ná alla leið og verða heimsfrægur. Ég tek oft Hugh Jackman, leikara, mér til fyrirmyndar. Hann byrjaði í söngleikjum og varð síðan leikari.“

Ara langaði fyrst að verða uppistandari.

„Svo bara fattaði ég að ég er ekki fyndinn. Þetta er í raun eini brandarinn sem ég er með.“

Hér að neðan má sjá viðtalið við Ara í heild sinni.