Freydís og Magnús sigurvegarar í svigi

Freydís Halla Einarsdóttir og Magnús Finnsson eru Íslandsmeistarar í svigi eftir spennandi keppni í Bláfjöllum á Skíðamóti Íslands.

Bæði voru þau með besta tímann í báðum ferðunum og sigruðu að lokum nokkuð örugglega. Titillinn er sá fyrsti hjá Magnúsi, en Freydís hefur unnið Íslandsmeistaratitilinn þrisvar.

Í gær urðu Hólmfríður Dóra Friðgeirsdóttir og Gísli Rafn Guðmundsson Íslandsmeistarar í stórsvigi.

Aðeins 11 sekúndubrotum munaði á Hólmfríði og Andreu Björk Birkisdóttur sem varð í öðru sæti. Bæði Hólmfríður og Gísli Rafn voru að vinna sína fyrstu Íslandsmeistaratitla.

Skíðasamband Íslands var með beina útsendingu frá keppninni í svigi á Facebook síðu sinni og má sjá upptökur frá mótinu þar.