Lamdi kærustuna og missti samninginn í Bandaríkjunum | Myndband

Hafnaboltakappinn Danry Vasquez frá Venesúela mun ekki spila í MLB-deildinni í Bandaríkjunum. Hann sá sjálfur til þess með ótrúlegri hegðun sinni.

Hinn 24 ára gamli Vasquez var á samningi hjá MLB-liðinu Houston Astros og hafði verið að spila með neðrideildarliðum í Bandaríkjunum til þess að sanna að hann væri nógu góður fyrir Astros.

Fyrir tveim árum síðan var hann handtekinn fyrir ofbeldi í garð kærustunnar sinnar. Kærurnar voru felldar niður eftir að hann hafði farið á reiðistjórnunarnámskeið og greitt sekt.

Hann gat því haldið áfram í boltanum en nú hefur myndband af líkamsárásinni lekið á netið og eftir þetta ótrúlega myndband er ekkert MLB-lið að fara að koma nálægt Vasquez. Astros hefur þegar rift samningnum við hann.

Á myndbandinu sést hann slá kærustuna fast og draga hana niður stiga. Lygileg framkoma.