Sex handteknir og krafist gæsluvarðhalds yfir fimm þeirra

Lögreglan á Norðurlandi eystra hefur farið fram á gæsluvarðhald yfir fimm mönnum á grundvelli rannsóknarhagsmuna. Fimm menn voru handteknir á Strandgötu á Akureyri í gær vegna gruns um alvarlega líkamsárás og frelsissviptingu í gær og sjá sjötti var handtekinn í nótt. Þetta kemur fram í tilkynningu á Facebook síðu lögreglunnar.

Samkvæmt heimildum Fréttablaðsins tengist málið fíkniefnauppgjöri.

Mennirnir eru grunaðir um að hafa beitt þrítugan mann ofbeldi á fimmtudag og svipt hann frelsi sínu. Mennirnir hafa flestir komið áður við sögu hjá lögreglu, ýmist vegna ofbeldismála eða fíkniefnamála. 

Rannsókn málsins hefur miðað áfram að sögn lögreglunnar og eru yfirheyrslur hafnar. „Vegna rannsóknarhagsmuna er ekki hægt að veita frekari upplýsingar að svo stöddu,“ segir í tilkynningunni.

Lögreglumenn á Akureyri, Húsavík, Dalvík ásamt sérsveit ríkislögreglustjóra tóku þátt í umfangsmiklum aðgerðum á Akureyri vegna málsins í gær. Þá voru framkvæmdar húsleitir á nokkrum stöðum og naut lögreglan á Akureyri stuðnings tæknideildar lögreglunnar á höfuðborgarsvæðinu við þá vinnu.