Fjölmenn mótmæli í Aþenu vegna Makedóníu-deilunnar

Nokkur hundruð þúsund Grikkir komu saman í miðborg Aþenu í morgun til að mótmæla því sem þeir telja eftirgjöf Grikklandsstjórnar í nafnadeilunni við stjórnvöld í Makedóníu. Grikkir eru margir andsnúnir því að Makedónía fái að kalla sig því nafni þar sem þeir telja nafnið einungis vísa í samnefnt hérað í Grikklandi.

Mótmælendurnir sögðust hafna nýjum tillögum Grikklandsstjórnar sem miða að því að leysa deiluna sem staðið hefur frá byrjun tíunda áratugarins þegar Makedónía lýsti yfir sjálfstæði frá Júgóslavíu.

Mótmælendurnir komu saman á Stjórnarskrártorginu (Syntagma) í Aþenu þar sem þeir hrópuðu slagorð um að Makedínía væri Grikkland. Þetta eru önnur fjölmennu mótmælin í landinu þar sem tillögum stjórnarinnar er mótmælt, en sambærileg mótmæli fóru fram í Þessalóníku þann 21. janúar síðastliðinn.

Hefur haft áhrif á stöðu Makedóníu

Nafnadeilan hefur haft mikil áhrif á stöðu Makedóníu í samfélagi þjóðanna þar sem hún hefur torveldað leið landsins til að gerast aðili að Evrópusambandinu og NATO.

Gríski stjórnarflokkurinn Syriza hefur lagt til að Makedónía fái að taka upp nafn þar sem orðið „Makedónía“ komi fyrir en að skýrt kæmi fram að ekki væri um héraðið í Grikklandi að ræða. Margir Grikkir telja hins vegar tillögur stjórnarinnar ganga allt of langt.

Sáttasemjari Sameinuðu þjóðanna, Matthew Nimetz, hefur lagt til að landið taki upp nafnið Lýðveldið Nýja-Makedónía.

Flugvöllurinn endurnefndur

Stjórnvöld í Makedóníu tilkynntu í síðasta mánuði að þau myndu gefa einum af flugvöllum landsins, þeim sem kenndur er við Alexander mikla, nýtt nafn til að liðka fyrir lausn deilunnar. Sömuleiðis stæði til að endurnefna hraðbrautina í landinu sem kennd er við Alexander mikla. Hraðbrautin nær að landamærum Grikklands og mun framvegis nefnast Vegur vináttunnar.

Grikkir hafa margir hverjir verið óánægðir með að Makedónar hafi reynt að eigna sér persónur og tákn sem ætíð hafa verið talin hluti af arfleifð Grikkja.