Stjórn Trump kynnir áætlanir um að minnka hömlur á olíuborun

Stjórn Donalds Trump Bandaríkjaforseta kynnti í dag áætlanir um að leyfa aukna leit og framleiðslu á gasi og olíu við strendur Bandaríkjanna. Trump hafði lofað því í kosningabaráttunni að minnka hömlur á olíuborun.

Verði þessar áætlanir að veruleika verður leit og framleiðsla gass og olíu leyfð við stóran hluta af strandlengju Bandaríkjanna. Um er að ræða stór svæði í Norður-Íshafi, Kyrrahafi og Atlantshafi. Samkvæmt frétt CNN tilkynnti Ryan Zinke innanríkisráðherra í dag að leyfðu svæðin gætu orðið 47 talsins en þau voru aðeins 11 í forsetatíð Baracks Obama.

Umhverfisverndarhópar hafa nú þegar gagnrýnt þessa áætlun harðlega og segja hana hættulega.