Fasteignasölur fengu dagsektir vegna ófullnægjandi verðmerkinga

Neytendastofa ákvað þann 5. desember síðastliðinn að veita sautján fasteignasölum dagsektir þar sem ástand verðmerkinga á sölustöðum og vefsíðum þeirra uppfyllti ekki þau skilyrði sem lög og reglur gera til upplýsingagjafar um þjónustuna.

Málið hófst þegar Neytendastofa hóf að kanna upplýsingagjöf hjá fasteignasölum hér á landi árið 2016. Skoðaðar voru vefsíður 109 fasteignasala og kannaðir sölustaðir á höfuðborgarsvæðinu. Kom þar í ljós að einungis ein af 109 fasteignasölum uppfyllti skilyrðin. Upplýsti stofan í framhaldinu fasteignasalana um þær skyldur sem á þeim hvíldu.

Í haust á þessu ári var málið aftur kannað hjá sömu fasteignasölum auk nýrra aðila á markaði. Eftir skoðun voru send 72 bréf þess efnis að skilyrði hefðu enn ekki verið uppfyllt. Var þar farið fram á úrbætur.

Þann 5. desember ákvað Neytendastofa, sem fyrr segir, að veita sautján fasteignasölum dagsektir vegna ófullnægjandi verðmerkinga á sölustöðum og vefsíðum. Segir í frétt Neytendastofu að ellefu þeirra hafi nú lagfært vefsíður sínar.

Hægt er að finna frétt Neytendastofu hér en upplýsingar um ákvarðanir hennar er að finna hér.