Vazquez: Við erum vondi karlinn

Lucas Vazquez sagði Real Madrid enn vera liðið sem hin liðin þurfa að óttast þegar dregið verður til 16-liða úrslita í Meistaradeild Evrópu á mánudaginn.

Evrópumeistararnir unnu Dortmund 3-2 í gær og tryggðu sér annað sæti H-riðils.

„Í Meistaradeildinni erum við vondi karlinn. Það er ljóst. Á síðasta ári fórum við áfram í öðru sæti riðilsins og það var ekkert vandamál,“ sagði Vazquez sem skoraði sigurmark Madrid í gær.

„Það er enginn óska mótherji. Til að vinna Meistaradeildina þá þarftu að sigra þá bestu.“

Real Madrid getur mætt Besiktas, Liverpool, Manchester City, Manchester United, PSG eða Roma í 16-liða úrslitunum.