Pacquiao segir að viðræður séu hafnar um bardaga gegn Conor McGregor

Manny Pacquiao, fyrrum heimsmeistari í hnefaleikum og núverandi þingmaður í Filippseyjum, hélt því fram í gær að hann sé í viðræðum um að mæta Conor McGregor í hnefaleikabardaga í apríl á næsta ári.  

Pacquiao, sem verður 39 ára síðar í þessum mánuði, tapaði veltivigtarbelti sínu í júlí á þessu ári þegar hann tapaði óvænt á stigum gegn fyrrverandi kennaranum og ástralanum Jeff Horn í heimabæ hans, Brisbane.

Pacquiao mótmælti þeirri niðurstöðu mikið eftir að bardaganum lauk og sakaði dómarana um að hafa verið hliðholla heimamanninum.  

McGregor hefur ekki barist í UFC eða hnefaleikum síðan hann tapaði gegn Floyd Mayweather með tæknilegu rothöggi í 10 lotu sl. ágúst í bardaga sem sló öll áhorfsmet. Var það fyrsti atvinnubardagi Conors í hnefaleikum en sá fimmtugasti hjá hinum ósigraða Mayweather. 

Conor gat borið höfuðið hátt eftir tapið gegn Mayweather. Margir hnefaleikasérfræðingar höfðu spáð því að Conor yrði gerður að aðhlátursefni í hringnum með Floyd, sem er af mörgum talinn besti hnefaleikakappi sögunnar, en svo var svo sannarlega ekki.

Þá gekk Conor úr hringnum sem einn ríkasti íþróttamaður heims, en talið er að hann hafi fengið í sinn vasa rúmlega 100 milljónir bandaríkjadala.

Hæsta útborgunin sem hann hefur fengið eftir UFC bardaga er hins vegar talin vera um fimm sinnum lægri, eða 20 milljónir bandaríkjadala. 

Er því ekki furða að Conor hafi áhuga á því að stíga aftur inn í hringinn.