Dr. Dre nýtur lífsins á Íslandi

Andre Romelle Young, betur þekktur sem Dr. Dre, er staddur á Íslandi og sást til hans við Höfðatorg fyrr í dag. Samkvæmt heimildum Vísis gistir hann á lúxushótelinu, Tower Suites Reykjavík, á efstu hæð í byggingunni.

Dr. Dre sást fyrir utan Höfðatorg í dag og var hann umkringdur fjölda lífvarða. Rapparinn sást einnig í miðbænum í gær og verslaði hann fatnað í fataverslun 66 gráður norður.

Samkvæmt heimildum Vísis verður rapparinn hér á landi í fjóra daga og mun hann ferðast um landið.

Dr. Dre er einn ríkasti tónlistarmaður heims en hann seldi til að mynda Apple fyrirtækið Beats Electronic og þénaði hann 80 milljarða á sölunni. Hann er metin á 740 milljónir Bandaríkjadali.

Hans frægustu lög eru til að mynda Still D.R.E., Forgot About Dre, The Next Episode. Hann gerði garðinn frægan á sínum tíma með rappsveitinni N.W.A. Hann er 52 ára en ekki er ljóst hvað kappinn er að gera hér á landi.