Búinn að græða einn og hálfan milljarð á World Series

Veðmálaheimurinn er gapandi yfir frammistöðu manns í Las Vegas sem er að mokgræða á úrslitum MLB-deildarinnar í hafnabolta, World Series.

Í nótt fór fram sjötti leikur LA Dodgers og Houston Astros. Hann endaði með 3-1 sigri Dodgers og liðin þurfa því að mætast í oddaleik.

Spilafíkillinn í Vegas er búinn að veðja á alla leiki World Series og hefur haft rétt fyrir sér um úrslit allra leikjanna hingað til.

Það sem vekur áhuga er að hann leggur gróðann af hverjum leik aldrei til hliðar. Hann veðjar öllu á næsta leik. Þessi djarfi tippari lagði því um 850 milljónir króna undir á leik sex. Það skilaði honum 634 milljónum króna í gróða. Ævintýralegt.

Þessi maður er ónafngreindur en hann er sagður vera undir þrítugt og frá austur-Evrópu. Nú bíða menn spenntir eftir því að sjá hvernig hann veðjar á oddaleikinn.