Tímamótarannsókn á heilanum: Telja sig hafa sannað að okkur dreymir í raun og veru

Vísindamenn hafa uppgötvað hvaða svæði það eru í heilanum sem hafa með drauma okkar að gera en rannsóknin sem leiddi þessar uppgötvanir í ljós mun hafa verulega þýðingu fyrir skilning okkar á tilgangi drauma þegar við sofum auk þess sem hún mun auka skilninginn á meðvitundinni sjálfri. Þá gefa breytingar í virkni heilans vísbendingar um hvað draumurinn er.

Það hefur löngum verið talið að draumar séu hvað mestir í svokölluðum REM-svefni en fólk hefur einnig dreymt þegar það er ekki í REM-svefni. Vísindamenn hafa klórað sér í kollinum yfir því og segir Francesca Siclari, einn af vísindamönnunum sem stóðu að þessari tímamótarannsókn nú, að það hafi í raun verið ráðgáta hvernig maður gat bæði dreymt og ekki dreymt á tveimur mismunandi stigum svefns.

Nú virðist hins vegar sem sú ráðgáta hafi verið leyst. Rannsóknin leiddi í ljós að þegar manneskju dreymir andlit þá virkjar það þær stöðvar í heilanum sem hafa með það að gera að þekkja andlit. Þegar manneskju dreymdi svo rými eða hreyfingu þá virkjaði það að sama skapi þær stöðvar í heilanum sem hafa með þessa þætti að gera.

„Þetta er í raun sönnun fyrir því að draumar er eitthvað sem við upplifum í raun og veru þegar við sofum en ýmsir vísindamenn hafa haldið því fram að draumar séu bara eitthvað sem við búum til þegar við vöknum. En kannski eru heilinn sem við notum þegar við vökum og heilinn sem við notum þegar við sofum mun líkari en við ímynduðum okkur áður þar sem þeir nota að hluta til sömu svæðin fyrir sömu reynslu,“ segir Siclari á vef Guardian þar sem ítarlega er fjallað um rannsóknina.

Sérfræðingar hafa lofað mikilvægi rannsóknarinnar og segja að hún gæti hjálpað til við að leysa ráðgátuna um tilgang drauma og jafnvel leitt okkur í einhvern sannleika um eðli mannlegrar vitundar. Hafa margir líkt rannsókninni og þeirra uppgötvana sem hún leiddi í ljós við það þegar vísindamenn uppgötvuðu REM-svefninn á sínum tíma.

Nánar má lesa um rannsóknina á vef Guardian.