Að kjósa Trump væri eins og að láta Stevie Wonder keyra bíl, að mati Stevie Wonder

Bandaríski tónlistarmaðurinn Stevie Wonder er á því að það sé jafn slæm hugmynd að kjósa Donald Trump sem forseta og að biðja hann sjálfan keyra bíl.

Þessi blindi tónlistarsnillingur sagði þetta í viðtali við Philly.com eftir að hafa spilað á tónleikunum Get Out The Vote til stuðnings Hillary Clinton síðastliðinn föstudag í Fíladelfíu.

„Ef það kæmi upp neyðartilvik og þú þyrftir að komast á sjúkrahús með hraði, myndir þú vilja hafa mig við stýrið,“ spurði Wonder blaðamanninn. Blaðamaðurinn svaraði því neitandi og bætti Wonder við: „Því ég hef enga reynslu af akstri, ekki satt?“

Hann sagði reynslu Hillary Clinton af stjórnmálum gera hana að betri frambjóðanda en Donald Trump.