Liam smakkaði smakkseðilinn

Liam Payne úr strákabandinu One Direction er staddur á landinu. Þetta kom fram á Vísi í gær. Heimildir herma að drengurinn hafi ásamt fríðu föruneyti lífvarða og umboðsfólks, um 16 manna hóps, snætt á veitingahúsinu Grillmarkaðinum á mánudaginn þar sem allur hópurinn fór í smakkseðilinn. Ekki sáust neinir aðrir meðlimir hljómsveitarinnar, né er vitað til þess að þeir séu hér á landinu en sveitin hefur verið í hléi síðan í desember síðastliðinn. Heimildir Fréttablaðsins herma einnig að Liam sé mögulega staddur hér á landi til að taka upp myndband.

Fleiri frægir popparar hafa komið hingað til lands að taka upp myndbönd á síðustu mánuðum og rennir það stoðum undir þessar fullyrðingar. Landið er klárlega á kortinu sem ákjósanlegur staður til að taka upp myndbönd enda auðvitað nóg af fallegri náttúru og auðvelt að fá vinnufrið. Ef að Liam er hér einn þá er hann líklega að taka upp myndband við lag af sólóplötu sinni. Söngvarinn hefur gefið út á twitter síðu sinni að hann ætli að gefa út sólóplötu seint á þessu ári eða snemma á því næsta.

Að neðan má sjá myndband One Direction við lagið History.

One Direction er ein farsælasta popphljómsveit í heimi en síðan að þeir gáfu út sína fyrstu plötu árið 2011 hafa þeir náð að toppa vinsældarlista á flestum stærstu mörkuðum heimsins auk þess að hafa átt fjöldamarga smelli á ferli sínum. Sveitin er á pari við poppara eins og Justin Bieber í vinsældum og mikill æsingur í kringum sveitina - svipað og er hjá söngvaranum kanadíska. Það er líklega mikil spenna í aðdáendum drengjanna hér á landi og áreiðanlega margir til í að bera söngvarann augum – hann hefur þó ekki hátt um för sína um landið líkt og Justin Bieber gerði þegar hann kom til landins síðasta september en þá mætti hann til dæmis eldhress á Subway-stað í Keflavík.

Getgátur eru uppi um að sveitin muni ekki koma aftur saman og sé í raun við það að leggja upp laupana. Í janúar var grein þess eðlis birt í US Weekly þar sem vitnað var í ónefndan heimildarmann sem heldur því fram að meðlimir sveitarinnar hafi ekki endurnýjað samninga sína eftir að hafa klárað On the Road Again túrinn í október í fyrra. Talsmenn sveitarinnar hafa reyndar neitað þessum fullyrðingum. Hinsvegar er það staðfest að Harry Styles hafi yfirgefið umboðsfyrirtækið sem sér um sveitina og því líklegt að hann sé á leiðinni að hefja sólóferil líkt og fyrrum félagar hans Zayn og Liam.

Liam og söngkonan Cheryl Cole byrjuðu saman snemma á árinu en hún virðist ekki vera með söngvaranum í för.