Erlent

Óttast að tugir séu látnir í Nice eftir að trukkur keyrði inn í mannþröng

Birgir Örn Steinarsson og Sunna Kristín Hilmarsdóttir skrifa
Trukkurinn sem keyrði inn í mannþröngina í Nice í kvöld.
Trukkurinn sem keyrði inn í mannþröngina í Nice í kvöld. Vísir/AFP
  • Að minnsta kosti 84 eru látnir, þar á meðal mörg börn, eftir að trukkur keyrði inn í hóp manna sem samankominn var á Promenade de Anglais í miðborg Nice á suðurströnd Frakklands að kvöldi fimmtudagsins 14. júlí til að fylgjast með flugeldasýningu vegna þjóðhátíðardags Frakka, Bastilludagsins.
  • Átján manns eru alvarlega slasaðir á gjörgæslu.
  • Talið er að um hryðjuverkaárás sé að ræða en bílstjóri trukksins var skotinn til bana af lögreglu. 
  • Borgarstjórinn í Nice hefur beðið fólk um að halda sig heima.
  • Neyðarástand vegna hryðjuverkaógnar, sem aflétta átti síðar í júlí, hefur verið framlengt um þrjá mánuði.


09:02: Að minnsta kosti 84 látnir og átján eru enn alvarlega slasaðir á gjörgæslu. Manuel Valls forsætisráðherra Frakklands hefur lýst yfir þriggja daga þjóðarsorg vegna árásarinnar.

02:25: Bernard Cazeneuve innanríkisráðherra Frakklands staðfesti á blaðamannafundi fyrir skemmstu að tala látinna væri komin upp í 80 og að 18 væru alvarlega slasaðir á gjörgæslu. 



01:55: Francois Hollande Frakklandsforseti ávarpaði þjóð sína í beinni útsendingu nú rétt í þessu. Hann sagði að staðfest væri að 77 hefðu látist í árásinni í Nice, þar á meðal mörg börn. 

„Enn á ný höfum við séð ofsakennt ofbeldi og það er augljóst að við þurfum að gera allt sem við getum til að berjast gegn þessum hryðjuverkum,“ sagði Hollande. 

Hann sagði að neyðarástandi vegna hryðjuverkaógnar sem átti að aflétta þann 26. júlí næstkomandi yrði framlengt um þrjá mánuði. Þá verður fjöldi hermanna kallaður út til að gæta öryggis almennra borgara í landinu og yfirvöld munu herða landamæraeftirlit.

Hollande fer síðar í nótt eða á morgun ásamt forsætisráðherra Frakklands, Manuel Valls, til Nice.

„Harmleikur skekur Frakkland enn á ný. Það er hryllilegt að nota vörubíl til þess að drepa fólk sem aðeins kom saman til að fagna á þjóðhátíðardaginn sinn. Frakkland grætur en við erum samt sterk og sterkari en þessir öfgamenn sem vilja særa okkur,“ sagði Frakklandsforseti. 



01:35: Skilríki 31 árs gamals manns með tvöfaldan ríkisborgararétt (Frakkland og Túnis) fundust inni í vörubílnum sem keyrt var inn í mannfjöldann í Nice samkvæmt Sky News. Maðurinn bjó í Nice en ekki hefur verið staðfest hver það var sem keyrði trukkinn.  

01:28: Jazzhátíð sem halda átti í Nice á laugardag hefur verið aflýst vegna árásarinnar sem og tónleikum með bandarísku söngkonunni Rihönnu sem fara áttu fram í borginni á föstudagskvöld. 

Hér fyrir neðan má sjá forsíðu franska blaðsins Le Figaro með fyrirsögninni Hryllingur, enn á ný en árásin í Nice á fimmtudagskvöld er þriðja árásin á almenna borgara í Frakklandi á seinustu 18 mánuðum. Ellefu létust í hryðjuverkaárás á ritstjórnarskrifstofur Charlie Hebdo í París í janúar í fyrra og þá létust 130 í hryðjuverkaárásum í París í nóvember síðastliðnum. 

00:34: Tala látinna er nú komin upp í 77 samkvæmt Sky News.

Sjá einnig: Myndir frá Nice



00:27: Christian Estrosi, forseti Nice-svæðisins, segir að árásin sé versti harmleikur sem orðið hefur á svæðinu. Þjóðarleiðtogar hafa fordæmt árásina, þar á meðal Barack Obama Bandaríkjaforseti. Þá hefur Donald Trump frestað því að tilkynna um varaforsetaefni sitt fyrir forsetakosningarnar í Bandaríkjunum í nóvember.



00:12: Samkvæmt upplýsingum frá saksóknurum í Frakklandi hefur verið hafin hryðjuverkarannsókn á árásinni í Nice. Það þykir renna stoðum undir þann grun að um hryðjuverkaárás hafi verið að ræða en enn hafa engin hryðjuverkasamtök lýst yfir ábyrgð á árásinni. Tala látinna er nú komin upp í 75 að því er fram kemur á Sky News.

00:05: Vegna árásarinnar í Nice í kvöld hvetur utanríkisráðuneytið Íslendinga á svæðinu til að láta aðstandendur vita af sér. Þetta kemur fram í tilkynningu frá ráðuneytinu. 

Ef þörf er á aðstoð eða ekki næst í Íslendinga bendir utanríkisráðuneytið á neyðarnúmer borgarþjónustu ráðuneytisins 545-9900 sem er opið allan sólarhringinn.

Hér fyrir neðan má sjá beina útsendingu frá Sky News:

23:47: Talið er að bílstjórinn hafi verið á 60 til 70 kílómetra hraða þegar hann keyrði trukkinn inn í mannfjöldann. Eftir að hafa keyrt inn í mannþröngina steig hann út úr bílnum og byrjaði að skjóta á fólk.

23.30: Christian Estrosi segir að trukkurinn hafi verið hlaðinn vopnum og sprengjuvörpum.

23.12

Óttast er að fleiri árásir muni eiga sér stað í dag. Neyðarástandi hefur verið lýst yfir í öllu landinu.

22:34

Vitnum fer ekki saman samkvæmt Sky News um hvort ökumaðurinn hafi ráðist út úr bílnum skjótandi byssu eftir að trukkurinn stöðvaðist.

23:02

Sky News var rétt í þessu að tilkynna að tala látinna sé komin upp í 73 manns.

22:27

Sky News talar um að um 60 manns séu látnir. Vitni segja að fleiri en einn trukkur hafi keyrt inn í mannþröngina. 









22:18

Vitni segja að ökumaðurinn hafi viljandi keyrt inn í mannþröngina og aukið hraðann eftir að hann skall á fyrstu fórnarlömbunum.



22:10

Talið er að um hundrað manns hafi særst. Ekki er vitað hvort fleiri komu að árásinni en ökumaður trukksins.

22:05

Talað er um að þrjátíu manns séu látnir. Búið er að stöðva manninn á trukknum en lögregla á að hafa skotið hann til bana.

22:00.

Fólk í Nice er byrjað að deila myndum og myndböndum á samfélagsmiðlum. Mikil skelfing greip um sig í kjölfar atviksins þar sem fólk hljóp frá vettvangi.

Donald Trump

Tengdar fréttir

Mest lesið


Fleiri fréttir

Sjá meira


×

Mest lesið