Lars: Verð að hrósa Íslendingum fyrir að sýna Eiði Smára þessa virðingu

Lars Lagerbäck er frekar súr með úrslitin gegn Ungverjalandi á EM 2016 í fótbolta í gær þar sem strákarnir okkar gerðu 1-1 jafntefli eftir að skora sjálfsmark á 88. mínútu. Liðið er með tvö stig eftir tvo leiki.

Íslenska liðið átti ekki góðan dag og var að mörgu leyti yfirspilað gegn Ungverjum sem voru miklu meira með boltann. Þeir ógnuðu markinu þó aldrei af viti og var svekkjandi að horfa upp á jöfnunarmarkið.

Sjá einnig:Eiður Smári: Íslenskir stuðningsmenn komnir á hærra plan

„Ég er bæði svekktur með úrslitin og að hluta með frammistöðuna. Varnarleikurinn og vinnslan var í háklassa. Ég horfði á leikinn aftur á leiðinni til baka og get ekki kvartað yfir neinu hvað það varðar. Sóknarleikurinn þarf að vera betri,“ sagði Lars

„Það hefur gerst hjá okkur eins og í undankeppninni að við skorum fyrsta markið og verðum of varkárir. Þá spilum við ekki eins og við eigum að gera. Það er eitthvað sem við verðum að leiðrétta. Ef við komumst yfir gegn Austurríki megum við ekki verða of varnarsinnaðir.“

Eiður átti að róa leikinn

Varnarleikur íslenska liðsins er búinn að vera flottur eins og Lars talar um en mörkin sem liðið hefur fengið á sig á mótinu hafa komið vegna raða mistaka. En hvernig horfði mark Ungverja við Lars?

„Það er alltaf hægt að benda á einstaklingana en þetta gerist svo hratt. Ég vil ekki hengja neinn leikmann. Við gerum reglulega mistök og stundum er okkur refsað fyrir það. Leikmennirnir voru orðnir þreyttir. Birkir var aðeins fyrir aftan manninn sinn og stöðuskiptingin milli Emils og Ara gekk ekki 100 prósent upp,“ sagði hann.

Eiður Smári Guðjohnsen kom inn á í seinni hálfleik til að reyna að róa leikinn. Hann komst því miður ekki nógu mikið í boltann en fékk tækifæri til að vinna leikinn í uppbótartíma. Móttökurnar sem hann fékk frá Íslendingunum 9.000 í stúkunni voru ótrúlegar.

„Framherjarnir voru svo þreyttir. Þeir unnu ótrúlega mikið í leiknum og því vildum við gera breytingu en við vonuðumst líka til að Eiður gæti komið inn með sína reynslu og skapað smá ró fyrir liðið,“ sagði Lars.

„Það var gaman að sjá móttökurnar sem hann fékk. Eiður hefur átt ótrúlegan feril og gert svo mikið fyrir íslenskan fótbolta. Ég vil hrósa stuðningsmönnunum mikið fyrir að sýna honum þessa virðingu,“ sagði Lars Lagerbäck.

Ekki missa af neinu sem gerist á EM í Frakklandi. Vísir er með hóp fjölmiðlamanna á mótinu sem færa ykkur allar nýjustu fréttirnar af strákunum okkar. Fylgdu okkur á Facebook, Twitter og Snapchat (sport365).