Gullspyrnur Gylfa í Grikklandi

Skallamörk Sverris Inga Ingasonar og Kolbeins Sigþórssonar í seinni hálfleik tryggðu Íslandi 3-2 sigur á Grikkjum eftir að hafa lent 2-0 undir eftir hálftíma leik. Arnór Ingvi Traustason minnkaði muninn fyrir hálfleik og íslenska liðið tók síðan öll völd í seinni hálfleik og vann flottan sigur en hversu mikilvægur var hann?

„Þetta var ekki nauðsynlegt en þetta var gott samt,“ sagði Heimir Hallgrímsson, landsliðsþjálfari Íslands, eftir leikinn. Ísland hafði tapaði þremur leikjum í röð fyrir leikinn og margir lykilmannanna höfðu ekki unnið landsleik síðan í september síðastliðnum. Það var aðallega hvernig strákarnir unnu leikinn sem gladdi þjálfarann.

„Það var karakter í strákunum.Við ákváðum að pressa þá í seinni hálfleik og það gekk upp. Mér fannst þetta vera flottur karaktersigur og gott fyrir hugarfarið að sýna það að við getum snúið leikjum við,“ sagði Heimir.

Íslenska liðið fékk á sig tvö klaufamörk í fyrri hálfleik en strákarnir fengu þó engan hárblástur í hálfleik. „Við sögðum í hálfleik við strákana að við værum þokkalega sáttir við spilamennskuna þrátt fyrir að við hefðum fengið á okkur þessi tvö mörk. Það var ekki mikið meira sem þeir gerðu í þessum fyrri hálfleik en að skora þessi tvö mörk. Þeir nýttu sín tækifæri hundrað prósent og við gátum ekkert verið pirraðir í hálfleik,“ sagði Heimir.

Það voru þrjú föst leikatriði sem skiluðu öllum mörkum íslenska liðsins, þar af komu þau tvö síðustu með skalla eftir gullsendingar frá Gylfa. „Hann er ágætis sparkari,“ sagði Heimir í léttum tón. Hann var sammála því að Arnór Ingvi Traustason hefði nýtt tækifæri sitt vel með þremur mörkum á þessu ári. „Hann er klókur að finna svæði og hann er afslappaður í teignum. Hann er bara markaskorari,“ sagði Heimir.

„Við erum búnir að vera að reyna ýmsa hluti og það hefur allt tekist í rauninni, það sem við höfum verið að leita eftir,“ segir Heimir. Hann gerði lítið úr þeim kenningum að öll töpin væru farin að herja á sál og sjálfstraust leikmanna. „Þetta er klisja sem blaðamenn taka oft ef það vinnast ekki tveir leikir í röð, að það sé þá komin einhver sálfræðikrísa. Ég held að þetta hafi verið gott til þess að slá á blaðamenn frekar en okkur,“ sagði Heimir og hann hrósaði íslenska liðinu.

„Mér fannst þetta góð frammistaða og það er það sem skiptir öllu máli. Ef við getum síðan byggt ofan á þetta og gert betur hluti sem við vorum að vinna í eftir þennan Danaleik. Mér fannst við gera það nokkuð vel í dag. Mér fannst við svara nokkuð mörgum spurningum sem við vildum frá svör við áður en við fórum út í þetta verkefni. Svo var gaman að fá að spila við lið sem eru með þrjá miðverði. Það var líka lærdómur í því,“ segir Heimir að lokum.