Ekkert að marka loforðið

 Donald Trump segist nú ekki ætla að standa við loforð, sem hann gaf skriflega á síðasta ári, um að styðja þann frambjóðenda sem á endanum verði ofan á sem forsetaefni Repúblikanaflokksins.

Allir þeir repúblikanar, sem höfðu sóst eftir að verða forsetaefni flokksins, undirrituðu yfirlýsingu um þetta í september síðastliðnum. Trump féllst á að skrifa undir, en gerði það að skilyrði að allir hinir undirrituðu líka. Sem þeir svo gerðu.

Þegar Trump var spurður út í þetta í fyrrakvöld í sjónvarpssendingu á CNN, þá sagðist hann hættur við. „Nei, við skulum sjá til hver það verður,“ sagði hann.

Trump hefur enn ekki tryggt sér meirihluta fulltrúa á landsþingi Repúblikanaflokksins, sem haldið verður í júlí. Á þinginu verður formlega gengið frá því hver verður forsetaefni flokksins.

Í forkosningum flokkanna, sem haldnar eru í ríkjum Bandaríkjanna þessar vikurnar, er verið að kjósa um það hvaða frambjóðanda fulltrúarnir á landsþinginu eiga að styðja.

Þessi grein birtist fyrst í Fréttablaðinu þann 31. mars.