Erdogan segist munu segja af sér reynist ásakanir Pútín sannar

Recep Tayyip Erdogan segir að hann myndi segja af sér, reynist ásakanir Vladimírs Pútín Rússlandsforseta um að Tyrkir kaupi olíu af liðsmönnum ISIS á rökum reistar.

„Ég ætla að grípa sterkt til orða. Ef sannanir eru fyrir slíku, mun göfgi þjóðar okkar krefjast þess að ég láti af embætti,“ sagði Erdogan í samtali við tyrkneska ríkisfjölmiðilinn Anatolia, og lagði áherslu á að Tyrkir fái alla sína olíu með löglegum leiðum.

Vladimír Pútín Rússlandsforseti sagði í gær að rússnesk yfirvöld hafi fengið frekari upplýsingar um að olían sem liðsmenn ISIS bora í Írak og Sýrlandi sé seld til Tyrklands. Sagði forsetinn þá ákvörðun Tyrkja að skjóta niður rússneska orrustuþotu hafi tengst því að viðhalda þessum olíuviðskiptum.

Mikil spenna er nú í samskiptum Rússlands og Tyrklands og sagðist Pútín ekki ætla að funda með Erdogan í París þar sem þeir eru nú í tengslum við loftslagsráðstefnuna.