Hryðjuverkasamtök tengd ISIS láta til sín taka í Afganistan

Allt að 300 liðsmenn samtaka tengdum ISIS réðust á eftirlitsstöð í austur-Afganistan í dag. Tveir lögreglumenn létust í árásinni en allt að 60 liðsmenn samtakanna voru felldir af afganska stjórnarhernum.

Liðsmenn samtaka, sem segjast vera í samstarfi við ISIS, hafa verið að sækja í sig veðrið í Afganistan að undanförnu en í yfirlýsingu sem talin er hafa verið gefin út af samtökunum var því haldið fram að mikil árás hafi átt sér stað í Nangarhar-héraði.

Heimamenn í Achin-sýslu í Nangarhar-héraði, skammt frá landamærum Afganistan og Pakistan, segja að hópurinn hafi farið um héraðið, tekið fanga og pyntað þá og limlest. Árásin kemur í kjölfar þess að afganski herinn felldi 51 liðsmann ISIS í aðgerðum í gær.