Berglind og Elísabet lentu í 17-24. sæti á EM

Berglind Gígja Jónsdóttir og Elísabet Einarsdóttir hafa lokið keppni á EM U22 eftir tap gegn sterku lið Hollands í morgun.

Íslenska liðið náði sér ekki á strik í byrjun leiks og lenti fljótlega undir. Bilið jókst þegar leið á í fyrstu hrinunni sem endaði 21-13 fyrir Hollandi.

Önnur hrinan var töluvert betri hjá stelpunum en hún var jöfn lengi vel. Svo fóru þær hollensku að nýta sér reynsluna og spiluðu frábærlega. Hrinan endaði 21-14 og 2-0 í hrinum fyrir Hollandi.

Berglind og Elísabet hafa því lokið leik en geta gengið sáttar frá mótinu þó svo að þær hafi viljað fara lengra. Liðið endaði í sætum 17-24 af þeim 32 liðum sem tóku þátt. Fyrir það fá þær 32 stig í baukinn sem nýtist þeim vonandi í nánustu framtíð.

Einar Sigurðsson, þjálfari stelpnanna sagðist vera mjög stoltur af þeim eftir mótið.

„Þetta er frábær árangur en auðvitað var svekkjandi að tapa leiknum áðan. Það að hafa unnið Noreg er mjög stórt og svo vorum við að spila við Þýskaland í riðlinum og Holland í morgun. Þetta eru stórþjóðir í blaki og við náðum að standa í þýska liðinu,“ segir Einar.

Tímabilinu er þar með lokið hjá stelpunum. Sumarið var mjög gott hjá liðinu en upp úr stendur gullið á Smáþjóðaleikunum og árangurinn á EM U22. Í dönsku mótaröðinni gekk liðinu mjög vel einnig og greinlegt að stelpurnar eru enn á uppleið í strandblakinu.

Berglind heldur til Danmerkur á ný um helgina til að spila blak í Odense í vetur en Elísabet leikur með HK í vetur.