Segjast hafa gert 56 loftárásir gegn ISIS

Mansour al-Jabour, yfirmaður flughers Jórdaníu, segir að gerðar hafi verið 56 loftárásir gegn Íslamska ríkinu á síðustu dögum. Æðstu ráðamenn landsins segja að hefnd þeirra verði hörð. ISIS brenndu jórdanskan flugmann til bana og birtu myndband af því fyrir nokkrum dögum.

„Við náðum markmiði okkar. Að hefna fyrir Muath. Þetta er þó ekki endirinn, þetta er bara byrjunin,“ segir al-Jabour.

Embættismenn Jórdaníu hafa sagt að þeir muni eyða hryðjuverkasamtökunum.

Bandaríkin og bandamenn þeirra og þar á meðal Jórdanía, hafa gert loftárásir gegn ISIS í Sýrlandi og Írak frá því í lok september í fyrra. Al-Jabour segir að alls hafi bandalagið farið í 5.500 flugferðir og þar á meðal 2.000 könnunarflug. Hann sagði flugher Jórdaníu hafa tekið þátt í 946 ferðum.

Þá sagði hann að um sjö þúsund vígamenn ISIS hefði verið felldir síðan loftárásirnar hófust.