Jóhann Berg: Dapurt ef ég hefði ekki samglaðst

„Það er frábært að vera kominn aftur,“ sagði Jóhann Berg Guðmundsson, leikmaður íslenska landsliðsins, við Vísi í Brussel í dag. Hann er aftur kominn í landsliðshópinn eftir að hafa misst af fyrstu þremur leikjum Íslands í undankeppni EM 2016 vegna meiðsla.

„Það var ömurlegt að missa af þessum leikjum en svona er fótboltinn. Ég samgladdist auðvitað með strákunum - annað hefði verið dapur af minni hálfu,“ sagði hann en viðtalið má sjá í heild sinni hér fyrir ofan.

Belgía teflir fram öflugu liði í leiknum á morgun og Jóhann Berg reiknar með erfiðum leik.

„Þeir verða eflaust meira með boltann en við höfum áður náð að stríða stórum þjóðum eins og Hollandi og það verður örugglega svipað uppi á teningnum á morgun.“

„Það vilja allir spila í leiknum gegn Tékklandi á sunnudag og þeir sem fá tækifæri á morgun vilja sýna þjálfurunum að þeir eigi heima í byrjunarliðinu. Ég á von á mikilli samkeppni um stöður.“

Sjálfur er Jóhann Berg í góðu formi en hann skoraði á dögunum tvívegis er lið hans, Charlton, gerði 2-2 jafntefli gegn Leeds í síðustu viku.

„Ég er með fínt sjálfstraust og vonandi fæ ég mínútur til að sýna mig á morgun.“