Aron: Tilfinningin ekki önnur nú

Landsliðsfyrirliðinn Aron Einar Gunarsson er orðinn spenntur fyrir leik Íslands gegn Tékklandi hér í Plzen annað kvöld og segir að strákarnir séu klárir í slaginn.

„Við vorum á góðri æfingu áðan. Það var gott tempó og menn virtust vera virkilega einbeittir. Við höfum farið vel yfir lið Tékka og finna veikleika á því. Þetta fer því allt að verða klárt.“

Hann segir að tilfinningin fyrir þennan leik sé ekkert frábrugðin tilfinningunni fyrir aðra leiki íslenska landsliðsins.

„Alls ekki. Það er kannski aðeins meiri spenna í manni en ekkert stress. Menn eru staðráðnir í að gera vel og halda áfram að bæta sig. Ef við fáum eitthvað úr þessum leik verður það bara bónus.“

„Það er ekki auðvelt að koma hingað til Tékklands og ætla að sækja þrjú stig. Þeir vilja ekki tapa fyrir Íslandi á heimavelli en við erum tilbúnir að refsa þeim ef þeir gefa færi á sér.“

Aron hrósaði keppnisvellinum, Doosan-leikvanginum, sem tekur tæplega 12 þúsund manns sæti. „Völlurinn er góður og maður sér að það getur skapast góð stemning á leiknum. Maður er því bara virkilega spenntur fyrir leiknum á morgun.“

Leikmenn tékkneska liðsins þekkjast vel eftir að hafa leikið saman með stærstu félagsliðum Tékklands. „En við erum búnir að vera saman í þessu lengi líka og kunnum mjög vel hver á aðra. Þetta verður því vonandi skemmtilegur leikur fyrir áhorfendur.“