Gylfi: Fórum aldrei almennilega í gang

„Þetta var mjög svekkjandi. Mér fannst við aldrei komast í gang. Leikskipulagið í fyrri hálfleik gekk ekki upp. Við pressuðum á þá betur í seinni hálfleik en heilt yfir var lítið spil í gangi hjá okkur. Það hefði verið sterkt að ná í jafntefli á erfiðum útivelli þrátt fyrir að spila illa,“ sagði Gylfi en viðtalið má heyra í heild sinni hér fyrir ofan.

„Við vissum að þeir myndu pressa mikið á okkur strax frá fyrstu mínútu og því byrjuðum við á að beita háum sendingum á þá í upphafi því við vildum ekki gera nein mistök.“

„En svo fór aldrei neitt almennilega í gang hjá okkur fyrir utan fimm mínútna kafla. En það vantaði heilt yfir meiri hreyfingu á menn.“

Hann vildi ekki skella skuldinni á neina einstaka leikmenn í mörkunum sem Ísland fékk á sig í kvöld. „Allir hafa verið frábærir í vörninni í síðustu leikjum og það kemur að því í fótbolta að maður fær á sig mark enda erum við að spila við góð lið.“

Gylfi segir að það hafi ekki verið nóg að skapa nokkur færi í leiknum - liðið þurfi að spila betri sóknarleik. „Við viljum vera betri og skora fleiri mörk þó svo að við séum á útivelli. Þetta var bara einn af þessum dögum og við þurfum að spila betur gegn Kasakstan næst.“