Gylfi skellti í sig töflum eftir leikinn

„Það er aldrei slæmt að taka þrjú eða sex stig á móti honum,“ sagði Gylfi Þór Sigurðsson, öðru nafni martröð Robin van Persie.

„Liðin sem koma hingað eru ekki að skapa mörg færi,“ sagði markaskorarinn Gylfi Þór Sigurðsson sem skoraði bæði mörk Íslands í 2-0 sigrinum á Hollandi.

Gylfi meiddist á ökkla í 3-0 sigrinum á Lettum og var óvíst um þátttöku hans fyrir leikinn. Sem betur fer spilaði miðjumaðurinn snjalli enda mörk hans sem skildu að í lokin.

„Mér leyst ekkert mjög vel á blikuna daginn eftir Lettaleikinn. Við erum eiginlega búnir að eyða of miklum tíma í sjúkraherberginu að vinna með ökklann. Svo vaknaði ég í morgun og var bara fínn,“ sagði Gylfi sem sagðist líða svona allt í lagi að leik loknum í ökklanum.

„Ég er aðeins aumur, reyndar nýbúinn að taka einhverjar töflur, þannig að ég finn líklega almennilega fyrir þessu í fyrramálið,“ sagði Gylfi léttur.

Gylfi skoraði úr vítaspyrnu eftir tíu mínútna leik. Hvað hugsaði hann?

„Ég hugsaði að ég þyrfti að skora. Það væri ekki slæmt að koma okkur yfir svo snemma því þá yrðu þeir pirraðir.“

En tekur hjartað ekkert aukaslag þegar öll augu eru á honum og svo mikið undir?

„Nei, ég æfi þetta á hverjum degi þannig að þegar þetta gerist er maður pollrólegur.“

Gylfi skoraði sigurmark Swansea gegn Manchester United í ensku úrvalsdeildinni á dögunum. Það má því með sanni segja að hann sé versta martröð Robin van Persie sem fer alltaf með skertan hlut frá borði eftir viðskipti við Gylfa.

„Það er aldrei slæmt að taka þrjú eða sex stig á móti honum,“ sagði Gylfi en lagði um leið áherslu á að liðsheildin hefði skilað stigunum þremur í kvöld.