Strákarnir okkar upp fyrir Dani og Svía

Frækinn 2-0 sigur Íslands á Hollendingum í gærkvöldi verður til þess að Ísland verður í hópi 30 sterkustu knattspyrnuþjóða heims er styrkleikalisti FIFA verður uppfærður þann 23. október.

Styrkleikalistinn tekur mið af úrslitum í landsleikjum þar sem fjögur atriði skipta máli. Úrslitin, keppnin sem leikurinn fer fram í, staða andstæðingsins á styrkleikalistanum og styrkleiki undankeppninnar. Holland sat í 4. sæti fyrir leik gærkvöldsins en má reikna með að fara í sjötta sæti eftir útreiðina á Laugardalsvelli í gær. Þar sem Hollendingar eru svo hátt skrifaðir fær íslenska liðið þeim mun fleiri stig.

Samkvæmt bráðabirgðaútreikningum á vef FIFA mun íslenska liðið fara úr 34. sæti listans með 646 stig og upp um þó nokkur sæti. Liðið ætti að vera með 816 stig eftir sigrana gegn Lettum og Hollandi. Úrslit í öðrum landsleikjum benda til þess að Ísland vippi sér upp fyrir Dani, Svía, Rússa, Rúmeníu, Skota, Wales, Gana og Serbíu.

Íslenska liðið hefur flogið upp styrkleikalista FIFA á undanförnum tveimur árum undir stjórn Lars Lagerback og Heimis Hallgrímssonar. Liðið var í 58. sæti í apríl, situr nú í 34. sæti og verður að óbreyttu í hópi 30 sterkustu þjóða heims við birtingu listans þann 23. október.

Staða Íslands á listanum skiptir miklu máli því farið er eftir stöðu þjóða á styrkleikalistum þegar dregið er í riðla fyrir undankeppni stórmóta.

Uppfært klukkan 23:36

Í fréttinni var sagt að flest benti til þess að Ísland færi upp fyrir nokkrar þjóðir, þar á meðal Rúmeníu. Eftir sigur Rúmeníu á Finnum á útivelli í kvöld er ljóst að Rúmenar verða áfram fyrir ofan Ísland á styrkleikalistanum þegar hann verður uppfærður 23. október. Ísland verður eftir sem áður fyrir ofan bæði Svía og Dani sem töpuðu 1-0 gegn Portúgal á Parken í kvöld.