Costa tæpur fyrir helgina

Jose Mourinho, stjóri Chelsea, segir að Diego Costa hafi sem stendur ekki heilsu til að spila tvo heila leiki í hverri viku.

Costa kom til Chelsea í sumar frá Atletico Madrid og hefur skorað sjö mörk í fyrstu fjórum leikjum liðsins í ensku úrvalsdeildinni.

Hann kom inn á sem varamaður þegar Chelsea gerði 1-1 jafntefli gegn Schalke í gær en Mourinho sagði að hann hafi ekki verið í standi til að vera í byrjunarliðinu.

„Costa á í vanda. Hann var í góðu lagi þegar hann kom til okkar frá Atletico,“ sagði Mourinho eftir leikinn í gær en Costa var að glíma við meiðsli aftan í læri í lok síðasta tímabils. Þau meiðsli tóku sig upp þegar hann var hjá spænska landsliðinu fyrr í mánuðinum.

„Ef hann fær viku til að leyfa vöðvanum að jafna sig þá getur hann spilað frá fyrstu mínútu. Þrír dagar eru ekki nóg.“

„Við erum vongóðir um að hann geti spilað [gegn Manchester City] á sunnudag. En ég reikna með því að hann spili ekki gegn Bolton [í deildarbikarnum] í næstu viku.“