Jón, Thelma og Kolbrún settu öll Íslandsmet í úrslitum

Sex Íslandsmet voru sett á þriðja keppnisdegi á Evrópumeistaramóti fatlaðra í sundi sem fram fer þessa dagana í Eindhoven í Hollandi. Þrír af fjórum sundmönnum Íslands tóku þátt í úrslitum í dag og settu þeir allir ný Íslandsmet í sínum greinum.

Thelma Björg Björnsdóttir úr ÍFR, reið á vaðið í 50 metra skriðsundi í flokki S6 en þar varð Thlema sjötta á 39,49 sekúndum sem er bæting á Íslandsmetinu sem hún setti í undanrásum í morgun (40,32 sekúndur).

Næstur á svið var Jón Margeir Sverrisson úr Fjölni, í 100m bringusundi S14 karla en Jón hafnaði í 4. sæti á 1:13,81 mínútum sem er nýtt Íslandsmet í greininni. Eldra met Jóns var 1:13,91 mín. og því bæting upp á 10 sekúndubrot.

Kolbrún Alda Stefánsdóttir úr Firði/SH, hafnaði í sjötta sæti í 100m bringusundi S14 kvenna á tímanum 1:24,14 mínútur sem er stórbæting á Íslandsmetinu sem hún setti í undanrásum í morgun en þá synti Kolbrún á tímanum 1:25,24 mínútur.

Millitími Kolbrúnar var einnig Íslandsmet í 50 metra bringusundi, 39,23 sekúndur. Spánverjinn Alonso Morales setti nýtt heimsmet í greininni áðan þegar hún kom í bakkann á 1:15,83 mínútum.

Á morgun er Thelma Björg ein íslenskra keppenda sem fer í laugina í Eindhoven þegar hún keppir í 200 metra fjórsundi S6.