Serena úr leik í París

Serena Williams, ríkjandi meistari á Opna franska meistaramótinu, féll óvænt úr leik í dag.

Serena tapaði fyrir Garbine Muguruza frá Spáni í tveimur settum, 6-2 og 6-2. Þetta er í fyrsta sinn á ferlinum sem hún fellur úr leik í fyrstu viku stórmóts sem efsta kona á heimslista.

Systir hennar, Venus Williams, féll einnig snemma úr leik á mótinu sem fer að venju fram á Roland Garros.

Serena hefur unnið sautján stórmót á ferlinum en hefur aldrei tapað svo illa á slíku móti. Hún vann aðeins fjórar lotur í dag en hafði ávallt unnið að minnsta kosti fimm í hverjum leik.

Þetta eru ekki fyrstu óvæntu úrslitin á mótinu en í gær féll Li Na úr leik. Hún er í öðru sæti heimslistans og gerist það nú í fyrsta sinn í sögunni að tvær efstu konur listans komast ekki áfram í þriðju umferð sama stórmótsins.

Þá féll hin danska Caroline Wozniacki úr leik í gær.